Mıanmada mektepke shabýyl jasalyp, 22 adam kóz jumdy

ASTANA. KAZINFORM — Mıanmada mektepke jasalǵan áýe shabýylynan 22 adam qaza tapty, olardyń kópshiligi — balalar. Bul týraly Lianhe Zaobao basylymy habarlady.

Kóz kórgen kýágerlerdiń aıtýynsha, eldiń ortalyǵyndaǵy Sagaın aımaǵynyń Oe Hteın Kvın aýylyndaǵy mektepke jasalǵan áýe shabýylynan 22 adam qaza tapqan. Basylymnyń jazýynsha, Mıanma áýe kúshteriniń áskerı ushaǵy jergilikti ýaqyt boıynsha 12 mamyr kúni saǵat 10:00 shamasynda atalǵan aýylǵa áýeden soqqy bergen.

Shabýylǵa ushyraǵan mekteptiń muǵalimi AFP agenttiginiń tilshisine oqıǵa saldarynan 20 oqýshy men 2 muǵalimniń qaza tapqanyn aıtqan.

— Balalardy aman alyp qalýǵa tyrystyq, biraq ushaq oǵan úlgertpesten bomba tastady, — dedi ol.

Aýyldyń bilim berý qyzmetkeri de qaza tapqandardyń sanyn rastady. Al Mıanma áskerı úkimeti oqıǵa jaıly ázirge málimdeme jasamady.

Sagaın aımaǵy — 28 naýryzdaǵy joıqyn jer silkinisiniń epıtsentri. Zilzaladan keıin qalpyna keltirý jáne qaıta qurý jumystaryn júrgizý úshin áskerıler 31 mamyrǵa deıin ýaqytsha bitim jarııalaǵan.

1948 jyly táýelsizdik alǵannan beri Mıanmada qarýly qaqtyǵys toqtaýsyz jalǵasyp keledi. 1960 jyly general Ý Ne Vın bılikti basyp alyp, áskerı úkimet ornatty, bul oqıǵa eldegi azamattyq soǵysty odan ári ýshyqtyrdy. 2023 jyldyń qyrkúıegindegi málimetke sáıkes, úkimet áskeri men kachın jáne taang sekildi etnıkalyq azshylyqtardan quralǵan qarýly toptar arasyndaǵy uzaqqa sozylǵan qaqtyǵystardan shamamen 2 mıllıon adam bosqyn bolyp, 6 myńnan astam adam qaza tapqan.

Buǵan deıin Mıanmada qylmystyq toptardyń qolyna túsken qazaqstandyqtardyń qutqarylǵanyn habarlaǵan edik.