Mıanmada qylmystyq toptardyń qolyna túsken qazaqstandyqtar qutqaryldy

ASTANA. KAZINFORM – Taıland arqyly Mıanmaǵa aldap jetkizilgen jáne adam saýdasymen aınalysatyn qylmystyq toptardyń qolyna túsken Qazaqstan, Ózbekstan jáne Qyrǵyzstan azamattary úılestirý sharalarynyń nátıjesinde qutqarylyp, elderine qaıtaryldy, dep habarlaıdy Ózbekstan Syrtqy ister mınıstrligi janyndaǵy «Dýne» aqparat agenttigi.

«Dýne» agenttiginiń málimetinshe, Ózbekstan azamattary M.S. (2000 j.t.) jáne B.V. (1997 j.t.) Mıanmada adam saýdasynyń qurbanyna aınalyp, Ózbekstannyń Taılandtaǵy Bas konsýldyǵynan kómek suraǵan.

Olardyń aıtýynsha, ınternet arqyly joǵary jalaqysy bar jumys usynylyp, ushaq bıleti tegin berilgen. Alaıda Taılandqa jetken soń, olardy aldap, zańsyz jolmen Mıanmaǵa ótkizgen. Ol jerde qylmystyq toptar olardy alaıaqtyq koll-ortalyqtarda jumys isteýge májbúrlep, baǵynbaǵan jaǵdaıda kúsh qoldanǵan jáne qoqan-loqqy kórsetken. Bostandyqqa shyǵý úshin iri kólemde aqsha talap etilgen.

Uqsas jaǵdaıǵa 8 Qyrǵyzstan azamaty men 4 Qazaqstan azamaty da tap bolǵan. Qyrǵyzstannyń Taılandtaǵy dıplomatııalyq ókildigi bolmaǵandyqtan, Qazaqstan men Ózbekstan dıplomattary Qyrǵyz tarapynyń ótinishi boıynsha kómek kórsetken.

– Mıanma jáne Taılandtyń quzyrly organdarymen kelissózder júrgizýdiń nátıjesinde atalǵan elderdiń azamattary bosatylyp, Taılandtaǵy Maesot shekaralyq beketinde Qazaqstan men Ózbekstan dıplomattaryna tapsyryldy. Olar úshin ýaqytsha baspana men tamaq uıymdastyryldy, – delingen resmı habarlamada.

11 sáýir kúni 2 ózbekstandyq, 4 qazaqstandyq jáne 7 qyrǵyzstandyq azamat Taılandtaǵy Qazaqstan men Ózbekstannyń dıplomatııalyq ókildikteriniń kómegimen otandaryna qaıtaryldy.

Aıta keteıik, buǵan deıin Qazaqstanda adam saýdasynyń qurbany bolǵan 250-ge jýyq adamǵa arnaıy áleýmettik qyzmet kórsetilgeni habarlanǵan bolatyn.