Mıanma jaǵalaýynda 500-den astam jolaýshy mingen eki keme iz-túzsiz joǵaldy
ASTANA. KAZINFORM – Birikken Ulttar Uıymynyń Halyqaralyq kóshi-qon uıymy (HKU) men BUU-nyń Bosqyndar isi jónindegi joǵarǵy komıssary basqarmasy (BJKB) Mıanma jaǵalaýynda bortynda 500-den astam adam bolǵan eki kemeniń sýǵa ketken bolýy múmkin degen aqparatqa alańdaýshylyq bildirdi, dep habarlaıdy BUU jańalyqtar qyzmeti.
Aldyn ala málimetke sáıkes, eki keme de maýsym aıynyń sońynda Mıanmanyń Rakhaın shtatynan jolǵa shyqqan. Jolaýshylardyń basym bóligi – rohındja halqynyń ókilderi. Olardyń arasynda Bangladeshtiń Koks-Bazar óńirindegi bosqyndar lagerlerinen kelgen adamdar da bolǵan.
Shamamen 250 adam otyrǵan alǵashqy kememen baılanys jolǵa shyqqannan keıin kóp uzamaı úzilgen. Al ekinshi kemede 280-ge jýyq adam bolǵany aıtylady. Ol 8 shildede Mıanmanyń Aıeıavadı óńiri jaǵalaýynda sýǵa ketken bolýy múmkin.
Kemelerdiń apatqa ushyraǵany men qaza tapqandar sany ázirge resmı túrde rastalǵan joq. Soǵan qaramastan, BUU agenttikteri adam shyǵynynyń aýqymdy bolýy yqtımal ekenin málimdedi.
Uıymdardyń málimetinshe, adamdar teńizge júzý maýsymy qolaısyz kezeńde shyqqan. Sońǵy ýaqytta aımaqta tolassyz jaýǵan jańbyr men sý tasqyny teńizdegi jaǵdaıdy odan ári kúrdelendirgen.
Eger bul aqparat rastalsa, bıyl Andaman teńizi men Bengal shyǵanaǵynda habar-osharsyz ketken nemese qaza tapqan adamdar sany aıtarlyqtaı artady. Olardyń qatarynda rohındja bosqyndary men Bangladesh azamattary bar.
BUU málimetinshe, bul jaǵdaı Mıanmadaǵy uzaqqa sozylǵan qaqtyǵys, májbúrli qonys aýdarý jáne rohındja qaýymdastyǵyna arnalǵan uzaq merzimdi sheshimderdiń joqtyǵynyń saldaryn kórsetedi.
Uıymdar Mıanmadaǵy gýmanıtarlyq ahýaldyń nasharlaýy men Bangladeshtegi bosqyndar lagerlerindegi múmkindikterdiń shekteýli bolýy adamdardy qaýip-qaterge qaramastan teńiz arqyly qashýǵa májbúrlep otyrǵanyn atap ótti.
Sonymen qatar, bul oqıǵa adam saýdasymen jáne zańsyz kóshi-qondy uıymdastyratyn qylmystyq toptardyń belsendiliginiń áli de joǵary ekenin ańǵartady.
BUU HKU men BJKB halyqaralyq qaýymdastyqty adam shyǵynyn boldyrmaý úshin óńirlik yntymaqtastyqty kúsheıtýge shaqyrdy. Uıymdar izdestirý-qutqarý jumystaryn keńeıtýdi, bosqyndarǵa halyqaralyq qorǵaý tetikterin qamtamasyz etýdi jáne adam saýdasy men zańsyz kóshi-qonǵa qarsy kúresti kúsheıtýdi usyndy.
Sondaı-aq BUU Bangladeshtiń rohındja bosqyndaryn qabyldap otyrǵan kúsh-jigerin joǵary baǵalap, halyqaralyq qaýymdastyqty bosqyndar men olardy qabyldaýshy qaýymdastyqtarǵa qoldaý kórsetýdi jalǵastyrýǵa úndedi.
Aıta keteıik, osyǵan deıin Jerorta teńizin kesip ótpek bolǵan 11 zańsyz mıgrant qaza tapqan bolatyn.
