Ózbek áýe kompanııasy Qazaqstanǵa reıster ashady
ASTANA. KAZINFORM – Kólik mınıstrliginiń Azamattyq avıatsııa komıteti ushý geografııasyn keńeıtý jáne halyqaralyq reısterdiń sanyn arttyrý jumystaryn júrgizip jatyr. 2025 jyldyń 5 mamyrynan bastap Qazaqstannyń áýe tasymaly naryǵyna Ózbekstan Respýblıkasynyń «My Freighter» (Centrum Air) jańa avıakompanııasy shyǵady.
Áýe kompanııa Tashkent-Almaty baǵyty boıynsha aptasyna eki reıs jıiligimen (dúısenbi jáne beısenbi) tikeleı turaqty jolaýshylar reısin oryndaı bastaıdy.
Odan ary 2025 jyldyń 6 maýsymynan bastap aptasyna (juma kúnderi) taǵy bir reıs qosylyp, osylaısha reıs sany aptasyna 3-ke deıin ulǵaıady.
Qazaqstan men Ózbekstan arasyndaǵy áýe qatynasynyń ashylýy elder arasyndaǵy saýda-ekonomıkalyq, iskerlik, ınvestıtsııalyq, týrızm jáne mádenı yntymaqtastyqty odan ári damytýǵa yqpal etedi.
Eske sala keteıik, buǵan deıin Astana-Samarqand baǵyty boıynsha jańa áýe reısi ashylatynyn jazǵan edik.