«Myń Bala» olımpıadasy: 5 myń oqýshy irikteldi
NUR-SULTAN. QazAqparat – QR Tuńǵysh Prezıdenti qory men «Elbasy Akademııasy» korporatıvtik qory Elbasynyń «El Ymiti» bastamasyn júzege asyrý aıasynda «Myń Bala» Ulttyq olımpıadasynyń birinshi kezeńiniń qorytyndysyn jarııalady, dep habarlaıdy QazAqparat tilshisi.
24 aqpanda bastalǵan olımpıadaǵa elimizdiń aýyl mektepterindegi 5 jáne 6-synyptan barlyǵy 295 myń oqýshy qatysty. Alǵashqy kezeńde bıylǵy oqý jylynyń І jáne ІІ toqsandaryndaǵy «Matematıka», «Jaratylystaný», «Informatıka», «Qazaq tili», «Orys tili» jáne «Aǵylshyn tili» pánderi úlgeriminiń nátıjesi boıynsha 5000 oqýshy irikteldi. Birinshi kezeńnen sátti ótken úmitkerler olımpıada qatysýshysy sertıfıkatyna ıe bolyp, ekinshi kezeńge joldama alady.
«Ekinshi kezeńde fýnktsıonaldyq saýattylyq pen abstarkty-logıkalyq oılaýdy baǵalaıtyn kompıýterlik testileý nátıjesi boıynsha 1000 bala irikteledi. Testileý aımaqtardaǵy Nazarbaev Zııatkerlik mektepteri negizinde ótedi. Ekinshi kezeńdegi synaqtyń ashyq ári ádil ótýin qamtamasyz etý maqsatynda múddeli taraptar úshin beıne-translıatsııa uıymdastyrylady. Beıne-translıatsııany kórý siltemesi testileý kúni www. fpp.kz ınternet-resýrsynda ornalastyrylady», - dep atap ótedi QR Tuńǵysh Prezıdenti qorynan.
1000 jeńimpaz-oqýshynyń tizimi 2020 jyldyń 11 mamyrynda www.fpp.kz ınternet resýrsynda jarııalanady. Eń joǵary upaı jınaǵan jeńimpazdarǵa daryndy balalarǵa arnalǵan mektepte bilimin jalǵastyrý jáne Nur-Sultan qalasynda jazǵy lagerde qatysý usynylady.
«Myń Bala» Ulttyq olımpıadasynyń ekinshi kezeńine ótken oqýshylar tizimimen myna silteme arqyly tanysýǵa bolady.
