MV Hondius krýız kemesinde eki Ulybrıtanııa azamaty hantavırýs juqtyrǵan
ASTANA. KAZINFORM - MV Hondius krýız kemesinde bolǵan Ulybrıtanııanyń eki azamaty hantavırýs juqtyrdy, dep habarlaıdy reseılik TASS.
Bul týraly Ulybrıtanııanyń Densaýlyq qaýipsizdigi agenttigi málimdedi.
Vedomstvonyń habarlaýynsha, Ulybrıtanııa bıligi halyqaralyq uıymdarmen birlesip, MV Hondius kemesindegi brıtan azamattaryn elge qaıtarý jumystaryn júrgizip jatyr. Dúnıejúzilik densaýlyq saqtaý uıymy kemede hantavırýs oshaǵy tirkelgenin rastaǵan.
Resmı derekke sáıkes, eki brıtan azamatynyń vırýs juqtyrǵany anyqtalǵan. Al Trıstan-da-Kýnıa arhıpelagynda júrgen taǵy bir azamatqa hantavırýs juqtyrdy degen kúdik keltirilip otyr.
Qazir kemedegi Ulybrıtanııa azamattarynyń eshqaısysynda aýrý belgileri joq. Soǵan qaramastan dárigerler olardyń jaǵdaıyn turaqty baqylaýda ustap otyr.
Sky News málimetinshe, naýqastardyń biri — 69 jastaǵy er adam. Ol 27 sáýirde Ońtústik Afrıka Respýblıkasyna jetkizilip, Iohannesbýrgte em qabyldap jatyr.
Ekinshi naýqas — 56 jastaǵy er adam. Ol Nıderlandqa evakýatsııalanyp, sol elde medıtsınalyq kómek alyp jatyr.
Ulybrıtanııanyń Densaýlyq qaýipsizdigi agenttigi MV Hondius kemesi 10 mamyrda Tenerıfege jetken kezde brıtandyq jolaýshylardy arnaıy ókilder qarsy alatynyn habarlady.
Aýrý belgileri baıqalmaǵan jaǵdaıda olar keıin arnaıy reıspen Ulybrıtanııaǵa jetkiziledi. Eldiń Syrtqy ister mınıstrligi jolaýshylar men ekıpaj músheleri úshin tegin repatrıatsııalyq ushaq uıymdastyrady.
Eline oralǵan azamattarǵa 45 kún boıy oqshaýlaný usynylǵan.
Buǵan deıin 24 sáýirde Ulybrıtanııanyń jeti azamaty kemeden Áýlıe Elena aralynda túskeni habarlanǵan edi. Olardyń ekeýi qazir Ulybrıtanııaǵa oralyp, karantınde jatyr. Dárigerler olardan aýrý belgilerin anyqtamaǵan.
Aıta keteıik, ǵalymdar osyǵan deıin Eýropanyń 29 elinde chıkýngýnıa vırýsynyń taralý qaýpi bar ekenin eskertken bolatyn.
