Mýzykalyq jas kórermen teatry balalar merekesin eki kún qatarynan toılaıdy
NUR-SULTAN. QazAqparat – Elorda ákimdiginiń Mýzykalyq jas kórermen teatry Halyqaralyq balalardy qorǵaý kúnine oraı jas kórermen nazaryna «Kúlshe qyz» mýzykalyq ertegisin tartý etti, dep habarlaıdy QazAqparat tilshisi.
Balalar merekesine oraı daıyndalǵan «Kúlshe qyz» mýzykalyq ertegisi orys dramatýrgy Evgenıı Şvarts pen kompozıtor Antonıo Spadavekkıanyń «Zolýshka» atty ertegisiniń jelisinen alynǵan. Shyǵarmany qazaq tiline aýdarǵan – Esim Segizbaev. Al, atalǵan erteginiń qoıýshy rejısseri – «Sahnager-2019» ulttyq teatr syılyǵynyń ıegeri, Mýzykalyq jas kórermen teatrynyń akteri, ári rejısseri Rasýl Ýsmanov.
Qoıylymǵa eki nemeresin ertip kelgen Gúlbarshyn Sıqymbekova ertegiden alǵan ásermen bylaı dep bólisti:
«Nemerelerim telearnadan kórip júrgen keıipkerlerimizdi sahnada kórgende qatty qýandyq dep aıtyp otyr. Akterlardyń oınaý qabileti joǵary boldy. Ásirese, balalarmen qarym-qatynas jasaǵandary unady. Teatr ujymyna sáttilik tileımiz! Qoıylymdary kóbeıe bersin», - dedi Gúlbarshyn Sıqymbekova.
Mýzykalyq jas kórermen teatrynda balalar merekesi erteń de jalǵaspaq. Saǵat 15:00-de Muhtar Áýezovtiń «Abaı-Toǵjan» mýzykalyq dramasy qoıylady.
Qoıylym Nur-Sultan qalasynda turatyn qyzmettik boryshyn oryndaý kezinde qaza tapqan Іshki ister organy qyzmetkerleriniń balalaryna arnalyp otyr.
Balalarǵa arnalǵan keshke Іshki ister mınıstrliginiń ortalyq apparaty, Ulttyq Ulan jáne Nur-Sultan qalasynyń Іshki ister departamenti qyzmetkerleri de qatysady.
