Mýzykalyq oryndaýshylardyń odaǵy qurylady
ALMATY. Jeltoqsannyń 25-i. QazAqparat /Erlik Erjanuly/ - Keshe Almatyda mýzykalyq oryndaýshylardyń qoǵamdyq birlestikteri birigip odaq qurǵandaryn málimdedi,
dep habarlaıdy QazAqparat.
"Odaq degen - ujym. Ujym - siz ben biz. Búgingi tańda júıelenip istelip jatqan is az. Odaq - ártúrli baǵyttaǵy búkil oryndaýshylardyń muń-muqtajyn sheship, arman-tilekteriniń oryndalýyn qamtamasyz etetin bolady. Máselen, Respýblıka saraıynda jylyna bálenbaı kontsert ótedi. Onyń ishinde ilip alary az. Qalǵany ne oryndaýshyǵa qýanysh ákelmeıdi, ne kórermenge lázzat bermeıdi. Biz ózimiz óspeı, mádenıetimizdi ósiremiz degen jaı áńgime. "Birlik túbi - bereke" degendi eske alatyn ýaqyt jetti", deıdi "Demeý" prodıýsserler men oryndaýshylar odaǵynyń" respýblıkalyq qoǵamdyq birlestiginiń tóraǵasy Qydyráli Bolman. "Qazaq áýenderiniń oryndaýshylary odaǵy" men "Demeý" prodıýsserler men oryndaýshylar odaǵynyń" birikkenin habarlaǵan tanymal ánshiniń aıtýynsha, buǵan áli kúnge deıin oryndaýshylar quqyǵyn qorǵaýdyń júıelenbeýi túrtki bolyp otyr. Endi atqarylatyn barlyq jumystar "Demeý" prodıýsserler men oryndaýshylar odaǵy" respýblıkalyq qoǵamdyq birlestiginiń strategııalyq is-josparlary boıynsha júzege asyrylatyn bolady. 2005 jyly qurylǵan bul birlestik áli kúnge deıin quzyrly organdarda resmı túrde tirkelgen birden-bir odaq sanalady. Buǵan deıin aımaqtyq jetekshi telearnalarmen jáne elimizdegi búkil fılarmonııalar men kontserttik zaldarmen kelisimshart jasap qoıǵan olar qazir ony keńeıtip jatyr. Bul kelisim boıynsha odaq janynan saılanbaly túrde qurylatyn biliktilik keńesiniń sheshimi boıynsha úzdik dep tanylǵan beınebaıandar telearnalarda tegin kórsetiledi. . Sondaı-aq odaq janynan kontsertterdi uıymdastyratyn jáne ózge de kásibı qyzmet túrlerin usynatyn kompanııalar ashylatyn bolady.
