Mýzyka shedevrleriniń ozyq týyndylary Astanany ásem áýezge bóleıdi
ASTANA. 8 maýsym. QazAqparat - Astana qalasynyń 15 jyldyq mereıtoıyn merekeleý qarsańynda elordada «Ózen áýenderi» dástúrli klassıkalyq mýzyka keshi ótedi.
Keıingi bes jylda «Ózen áýenderi» klassıkalyq mýzyka keshi elorda úshin tek dástúrge aınalyp ǵana qoıǵan joq, mýzykanttar men mýzyka áýesqoılarynyń saǵyna kútetin mádenı oqıǵasyna aınaldy.
Astana qalasynyń resmı saıtynyń habarlaýynsha, dástúr boıynsha sahna Esil ózeniniń ústine ornatylady. Osy jyly onyń beınesi eki jaqqa ashýly baqalshyqty eske túsiredi. Atalǵan «Ózen áýenderi» klassıkalyq mýzyka keshin sımfonııalyq mýzyka kontsertiniń óner sheberleri ashady.
Brams, Berlıoz, Shtraýs, Rossını, Offenbah, Ravel, Sen-Sans, Chaıkovskıı, Djadzotto jáne basqa da mýzyka shedevrleriniń ozyq týyndylary Astanany ásem sazǵa bóleıdi. Orkestr derıjeri álemge áıgili- Krıstıan Sandý.
Mýzykalyq keshtiń ekinshi kúni Dj. Verdıdi eske alýǵa jáne onyń 200- jyldyǵyna arnalǵaly otyr. Osylaısha kóptiń kózaıymyna aınalǵan «Travıata» operasy ózen aıdynynda shyrqalatyn bolady. Operadaǵy jetekshi partııalar Alfred pen Vıoletta rólin arnaıy shaqyrylǵan halyqaralyq laýreattar - Marıýs Vlad (tenor) men Irına Iordocheský(soprano) somdaıdy.
Kesh birneshe jyl ótse de ánsúıer qaýymnyń júreginen ózindik oryn alyp, ómirsheńdigin joımaǵan djaz mýzykasynyń kontsertimen aıaqtalady. Bul joly Astana men Almaty qalasynan kelgen bıg-bendar astanalyqtar men qala qonaqtarynyń kóńilin kótermek.
