Mýzyka mektepterin ońtaılandyrmaımyz - Erlan Saǵadıev
ASTANA. QazAqparat - QR Bilim jáne ǵylym mınıstri Erlan Saǵadıev mýzyka mektepterin ońtaılandyrýǵa qytysty pikir bildirdi, dep xabarlaıdy QazAqparat tilshisi.
«Qala deńgeıinde belgili bir sheshimder bolǵan. Onymen vıtse-mınıstrimiz (Elmıra Suxanberdıeva - avt.) aınalysyp jatyr. Bilýimshe, mýzyka mektepterin ońtaılandyrmaıtyn boldy. Negizi, ondaı jospar bolǵan da joq. Mýzyka mektepteri sııaqty mekemelerdi basshylyq deńgeıinde biriktirýge qatysty oı boldy. Máselen, bir dırektor úsh mektepti basqarady. Maǵan solaı baıandaǵan bolatyn. Biraq men ózim «bir mektep jabyldy, ıa bolmasa, jumys oryndary qysqardy» degendi estigen joqpyn. Mýzyka mektepterin eshkim ońtaılandyrmaıdy», - dedi E.Saǵadıev QazAqparat tilshisine bergen suxbatynda.
QR Bilim jáne ǵylym vıtse-mınıstri Elmıra Sýxanberdıeva mýzyka mektepterin ońtaılandyrý sharalaryn túsindirgen bolatyn. Onyń aıtýynsha, mýzyka mektepterin Jastar saraıy sııaqty bir mekeme retinde uıymdastyrý sharalary qolǵa alyndy. Sóıtip, atalǵan mekemelerdi ońtaılandyrý josparlanyp otyr.
«Jastar saraıynyń basshysy óz baǵdarlamasyn usynýy qajet. Mýzyka mektepterin qalaı damytady jáne taǵysyn taǵy. Bul rette barlyq jumys oryndary saqtalady. Ujymdardy eshkim taratpaıdy. Muǵalimder de baıaǵy jumysynda qala beredi. Qazir Almaty men Astanada osy máselege qatysty shý shyǵyp jatyr ǵoı. Negizi, bunyń bári - mýzykalyq mektep basshylarynyń narazylyǵy. Sebebi ondaı jaǵdaıda basshylyq aýysady. Al muǵalimder tolyǵymen qalady. Oqýshylardyń sany da qysqarmaıdy», - dedi E.Sýxanberdıeva jýrnalısterge bergen suxbatynda.
Vıtse-mınıstrdiń sózine qaraǵanda, eki-úsh mekemege bir basshyny qoıý sııaqty ońtaılandyrý sharalary orta bilim berý salasynda da bar tájirıbe. Endi osyndaı tájirıbe Astana qalasynda qolǵa alyndy.
«Bir dırektor eki-úsh mýzykalyq mektepti basqarady. Biz Máskeý qalasyndaǵy mektepterdiń tájirıbesin negizge alyp otyrmyz. Ol jaqta úzdik bir mektepke soǵan jaqyn ne janynda ornalasqan eki-úsh mektep qaraıdy. Sol sııaqty mýzykalyq mektepterdiń basshylyǵyn ońtaılandyrý sharalary da atqarylyp jatyr. Al bul sharadaǵy negizgi maqsat - ondaı mekemelerdi irilendirý, ıaǵnı, bir myqty mekeme aıasynda toptastyrý», - deıdi E.Sýxanberdıeva.
