MýzTV syılyǵyn tabys etý shoýynda reseılik ártister qazaq mýzykasynyń súıemeldeýimen «qyzyl kilemmen» júrip ótedi
ASTANA. QazAqparat - MýzTV telearnasy «Qazaqstannyń úzdik ártisi» arnaıy syılyǵyn bekitti. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte atalǵan telearnanyń bas dırektory Arman Dáýletııarov málim etti.
«Aǵymdaǵy jyly Qazaqstanda ótetin MýzTV syılyǵy úshin telearna arnaıy atalym taǵaıyndaý týraly sheshim qabyldady. Ol «Qazaqstannyń úzdik ártisi» dep atalady», - dedi ol.
Onyń atap ótýinshe, MýzTV syılyǵy tarıhynda mundaı jaıt alǵash ret oryn alýda.
«Demek, Qazaqstan turǵyndary daýys berý rásimine qatysyp, jyldyń úzdik ártisine tańdaý jasaı alady. Daýys berý rásimi Reseıdegideı bolady. Biz medıa-bıznestiń, shoý-bıznestiń kórnekti qaıratkerlerine úmitkerlerdi jiberemiz. Al olar halyqtyq daýys berýge iriktep alatyn bolady. Olar bir aı ishinde 5 úmitkerdi iriktep alady. Daýys berý «Qazaqstan» telearnasy arqyly júrgiziledi jáne jeńimpaz júldege ıe bolady», - dedi A.Dáýletııarov.
Sonymen qatar onyń sózine qaraǵanda, MýzTV syılyǵyn tabys etý shoýynda reseılik ártister qazaq mýzykasynyń súıemeldeýimen «qyzyl kilemmen» júrip ótedi.
Aıta keterligi, MýzTV syılyǵyn tabys etý shoýy 5 maýsym kúni elordadaǵy «Astana-Arena» stadıonynda ótedi. Odan bir kún 25 qazaqstandyq, 25 reseılik óner juldyzynyń qatysýymen gala-kontsert uıymdastyrylady.
