Muztaý etegindegi tylsym tas – sheteldik týrıster aǵylatyn Kindiktastan fotoreportaj
ÓSKEMEN. KAZINFORM – Shyǵys Qazaqstan oblysy Katonqaraǵaı aýdanynda Altaı taýynyń eń bıik shyńy – Muztaýdyń etegindegi Kindiktasqa álemniń ár túkpirinen týrıster keledi. Olar qasıetti sanalatyn tasty ustap, arman-tilekterin aıtady. Kóz aldyńnan ketpese eken dep tileıtin sulý tabıǵaty bar sol jerge Kazinform tilshisi baryp, fotoreportaj jasap qaıtty.
Muztaý shyńy – elimizdiń kıeli jerleriniń biri. Ol aspanmen astasqan ór Altaıdyń eń bıik núktesi. Bıiktigi – 4506 metr.
Sonyń etegindegi Kindiktastyń qasıetin seziný úshin osynda Qazaqstannyń ár óńirinen bólek, sheteldik meımandar da az kelmeıdi.
Ulttyq oıýmen bezendirilgen taqtada mynadaı mátin jazylyp tur: «Kindik tas Muztaý taýynyń eteginde ornalasqan. Bul tas erekshe energetıkalyq qýatqa ıe jáne odan mıstıkalyq kúsh taraıdy. Bul jer – jerdiń túbinen taraıtyn kúshtiń shyǵatyn orny. Kórgen adamdar burshaqty daýyl bolǵanda, atmosferalyq elektr togy aınalany qanyqtyrǵan kezde kindik tastyń ústinde kúlgin tústi jarqyl paıda bolady deıdi».
Osy mátin úsh tilde jazylypty, atap aıtqanda qazaq, orys, aǵylshyn.
Keı adamdar bul tasty Muztaýǵa taǵzym etetin, tilek tileıtin kıeli oryn dep sanaıdy. Tastyń mańyna jeke zat qaldyrý sııaqty dástúr de qalyptasqan desedi.
Alaıda biz barǵanda eshqandaı zatty baıqamadyq. Jurt sol jerde arman-tilekterin aıtyp, rýhanı kúsh alamyz dep senedi.
Kindiktastyń mańynda jatqan túsi soǵan uqsas, biraq pishini kishi basqa da tastardy baıqadyq.
Sondaı tastardyń birinde qytaı tiline uqsaıtyn qarippen jazý jazylypty.
Bul jerdiń tabıǵatynyń sulýlyǵyn eshqandaı fotoapparat dálme-dál jetkize almasy anyq.
Taý bókterinde sary men jasyl aralas qalyń aǵash. Zeńgir taýlardyń ortasyn qaq bólip, Aqberel ózeni aǵyp jatyr.
Qazaq úshin taý qashanda bıiktiktiń, beriktiktiń, erkindiktiń sımvoly bolǵan. Osy turǵydan alǵanda Muztaý - adam men tabıǵat arasyndaǵy baılanystyń da beınesi ispetti.
Muztaý shyńynyń Qazaqstan men Reseı shekarasynda ornalasýy onyń tabıǵı ári geografııalyq mańyzyn odan saıyn arttyra túsedi. Soǵan oraı munda shekara beketiniń modýli ornatylypty. Ol tek jaz kezinde jumys isteıdi. Sol úshin ishke kirip kóre almadyq.
Oblys ákimdiginiń málimetinshe, modýlde tórt shekarashy kezekshilik atqarady. Onda shekarashylarǵa qajetti birneshe bólme qarastyrylǵan. Modýl qajetti jabdyqtarmen qamtamasyz etilgen.
Kóbine basyn bult shalyp turatyn Muztaý shyńy búgin ashyq, ap-anyq kórindi. Keı adamdar osy saparǵa uzaq daıyndalyp áıteýir degende jetkende Muztaýdy kóre almaı armanda ketip jatady. Al bizdiń jolymyz bolǵan eken.
Altaı taýynyń eń bıik shyńyn ekrannan emes, óz kózińizben kórgińiz kelse mindetti túrde baryńyz, qadirli oqyrman. Sol kezde sizdiń de jolyńyz bolyp, Muztaý shyńy ashyq bolǵaı!
Eske salsaq, buǵan deıin Katonqaraǵaı memlekettik ulttyq tabıǵı parkinde fototuzaqqa eki búrkit túskeni habarlanǵan.
