Mýzykant Erlan Kókeevtiń gıtarasy tabyldy
ASTANA. KAZINFORM – Qazaqstandyq tanymal mýzykant, ánshi Erlan Kókeev ushaqta joǵalǵan gıtarasynyń tabylǵanyn málimdedi.
«25 maýsymda Óskemennen Almatyǵa ushtym. Gıtarany ózimmen birge alǵam, biraq áýe kompanııasynyń qyzmetkerleri gıtarany júkke tapsyrý kerek dedi, men tapsyrdym. Menimen birge Astanaǵa ushqan bir top jolaýshy boldy, olarda da gıtara boldy. Almatyǵa ushyp kelsem, gıtara joq, birden polıtsııaǵa aryz jazyp, júgindim», - dedi Erlan Kókeev agenttik tilshisimen uıaly telefon arqyly sóılese turyp.
Onyń aıtýynsha, mýzykanttyń gıtarasyn basqa jolaýshy shatastyryp alyp ketken.
«Jolaýshy (er adam) meniń gıtaramdy Astanaǵa alyp ketken. Men izdeý salyp, aıǵaı-shý shyqqannan soń er adam ol meniń gıtaram ekenin túsingen. Osylaısha ol kisi maǵan gıtaramdy qaıtardy, gıtara bútin», - deıdi ol.
Sondaı-aq, mýzykant Air Astana kompanııasynyń ázirge eshqandaı sheshim qabyldamaǵanyn aıtty. Kompanııa ókilderiniń paıymdaýynsha, gıtara Almatyǵa jetkizildi, odan ári júktiń jolaýshyǵa jetýine áýejaı jaýapty.
Keshe Air Astana tanymal mýzykant Erlan Kókeevtiń gıtarasyn izdep jatqany týraly habarlaǵan edik.
Mýzykanttyń aıtýynsha, mundaı oqıǵa birinshi ret bolyp jatqan joq jáne barlyq jaǵdaı Air Astana kompanııasyna qatysty.
