Mýzykalyq jas kórermen teatry jańa maýsymyn «Abaı-Toǵjan» qoıylymymen ashty
ASTANA. KAZINFORM — Astana ákimdiginiń Mýzykalyq jas kórermen teatry jetinshi maýsymynyń shymyldyǵyn túrdi. Bıyl teatr repertýaryn jańa qoıylymdarmen tolyqtyryp, kórermenge túrli janr men mazmundaǵy spektaklderdi usynýdy josparlap otyr, dep habarlaıdy elorda ákimdiginiń resmı saıty.
Jetinshi maýsymnyń shymyldyǵyn teatrdyń dırektory ári kórkemdik jetekshisi, Qazaqstannyń eńbek sińirgen qaıratkeri Ashat Maemırov ashyp, ujym úshin jańa kezeńniń bastalýymen quttyqtady. Ol teatrdyń osy ýaqytqa deıingi shyǵarmashylyq jolyna toqtalyp, tarıhymen tanystyrdy.
— Búgin jetinshi maýsymnyń shymyldyǵyn ashyp jatyrmyz. Rasynda, osydan alty jyl buryn jetinshi maýsymǵa kelemiz dep oılamaǵan edik. Ýaqyt júırik eken. Osy jyldar ishinde teatrymyzdyń repertýarynda 30-dan astam qoıylym jınaqtaldy. Qazaqta jeti degen sandy erekshe qasıet, kıe tutady. Sondyqtan jetinshi maýsymda teatrymyzda qadir-qasıeti mol, erekshe mazmuny men sıpaty kelisken, kórkemdik izdenisterge toly qoıylymdar bolady dep senemin. Bizdiń teatr 2020 jylǵy 14 jeltoqsanda Muhtar Áýezovtiń «Abaı-Toǵjan» qoıylymymen ashylǵan bolatyn. Kúni keshe ǵana qazaqtyń aqyny, oıshyly uly Abaıdyń týǵan kúnine oraı Abaı kúni atalyp ótti. Bıyl — Abaıdyń týǵanyna 181 jyl. Biz Abaı atamyzdyń 175 jyldyǵynda arnaıy ashylǵan bolatynbyz. Sondyqtan «Abaı-Toǵjan» — bizdiń tólqujatymyz. Bul qoıylymnyń teatrymyz úshin orny erekshe, — dedi qoıylym rejısseri, teatrdyń dırektory ári kórkemdik jetekshisi, Qazaqstannyń eńbek sińirgen qaıratkeri Ashat Maemırov.
Teatr ujymy bıylǵy maýsymnyń alǵashqy qoıylymy retinde «Abaı–Toǵjan» spektakli kórermenge tartý etti. Qoıylymnyń teatr repertýarynda ózindik orny bar. Sonymen qatar jańa maýsym barysynda kórermenge «Gaýhartas», «Qosh bol, Gúlsary» sekildi qoıylymdar usynylyp, jańa týyndylar men premeralar sahnalanbaq.
«Abaı-Toǵjan» — kórermenniń yqylasyna bólengen, teatr repertýaryndaǵy mańyzdy qoıylymdardyń biri. Jańa maýsymda da kórermenderdi osy spektaklmen qaıta qaýyshtyrýdy josparlap otyrmyz. Sonymen qatar repertýarymyzda «Gaýhartas», «Qosh bol, Gúlsary» sekildi qoıylymdar bar. Budan bólek, kórermenge usynatyn jańa týyndylarymyz ben birneshe premera daıyndalyp jatyr.
— Jalpy, jańa maýsymnyń bastalýy — biz úshin úlken mereke. Ujym úshin bul shyǵarmashylyq jumystyń jańa kezeńi. Demalystan keıin ár ártis sahnaǵa jańa kúshpen, tyń oımen, erekshe shabytpen oralady. Sondyqtan jańa maýsymda kórermenge de jańa áser syılaıtyn dúnıeler kóp bolady dep oılaımyn. Kórermenderimizdi de saǵyndyq. Teatr men kórermenniń arasyndaǵy baılanys biz úshin óte mańyzdy. Sol sebepti jańa maýsymda kórermenderimizben qaıta qaýyshyp, jaqsy qoıylymdarymyzdy usynýǵa qýanyshtymyz. Aldaǵy ýaqytta tyń dúnıeler men jańa premeralar arqyly kórermenniń kóńilinen shyǵýǵa tyrysamyz, — dedi Mýzykalyq jas kórermen teatrynyń ártisi Asylhan Tólepov.
Teatrdyń basty baǵyttarynyń biri — kórermenge sapaly qoıylym usynyp qana qoımaı, sahna arqyly qoǵamdaǵy mańyzdy taqyryptardy kóterý. Ásirese jas kórermenniń teatrǵa qyzyǵýshylyǵyn arttyryp, onyń estetıkalyq talǵamy men dúnıetanymyn qalyptastyrýǵa yqpal etý mańyzdy.
Osylaısha, Mýzykalyq jas kórermen teatrynyń jetinshi maýsymy jańa shyǵarmashylyq josparlar men tyń izdenisterge jol ashty. Aldaǵy ýaqytta kórermendi tanymal qoıylymdarmen qatar, jańa týyndylar men premeralar kútedi. Endigi kezekte teatr ujymy jańa rólder men qoıylymdar arqyly kórermenge oı salyp, jetinshi maýsymdy mazmundy ári este qalarlyq shyǵarmashylyq kezeńge aınaldyrýdy kózdeıdi.
Buǵan deıin bıyl el teatrlarynda balalarǵa arnalǵan qoıylymdardy 560 myńǵa jýyq kórermen tamashalaǵanyn jazǵanbyz.
