Mýzyka, teatr, kıno: Almatyda mamyrdyń alǵashqy kúnderi qaıda barýǵa bolady
ALMATY. KAZINFORM – Almaty qalasynda 1-3 mamyr aralyǵynda kóptegen qyzyqty is-sharalar ótedi.
Mýzyka
2 mamyr kúni saǵat 20:00-de Motor Club (Nazarbaev dańǵyly, 50) sahnasynda tanymal rep oryndaýshy Feduk óziniń hıt ánderin shyrqaıdy.
3 mamyr saǵat 19:00-de Almaty Arena kesheninde jas ártisterdiń qatysýymen NonStop Music Fest atty aýqymdy mýzykalyq festıval ótedi.
Sondaı-aq Qazaqstan halqynyń birligi kúnine oraı Almatynyń ár aýdanynda merekelik kontsertter, etnomádenı birlestikterdiń óneri men oıyn-saýyq baǵdarlamalary uıymdastyrylady. Negizgi sharalar 1 mamyr kúni saǵat 10:30-da Respýblıka saraıynyń aldyndaǵy alańda bastaldy.
Teatr
Ǵ. Músirepov atyndaǵy balalar men jasóspirimder teatrynda (Abylaıhan dańǵyly, 38) 2 mamyr kúni saǵat 11:00-de «Kishkentaı hanzadanyń oralýy», al saǵat 18:30-da «Aq keme» qoıylymdary qoıylady. 3 mamyr kúni teatr kórermenderi «Oıan, qalyńdyq» spektaklin saǵat 18:30-da tamashalaı alady.
M. Lermontov atyndaǵy teatrda «Ýborşık» atty komedııalyq qoıylymnyń premerasy ótedi. Erık Assýstyń komedııasyn 1 mamyr (19:00), 2 jáne 3 mamyr (18:00) kúnderi tamashalaýǵa bolady.
Almaty Theatre sahnasynda elordalyq Astana Ballet ujymy kóktemgi gastroldik saparyn ótkizedi. 2 jáne 3 mamyr kúnderi ázirbaıjannyń kóne ári ádemi ańyzyna negizdelgen «Eki kilem» baleti sahnalanady.
«ARTıShOK» teatry táýelsiz óner súıer qaýymdy Cabaret Maiakovsky qoıylymyna shaqyrady. Pank-kabare stılindegi bul týyndy 1 jáne 2 mamyr kúnderi saǵat 19:00-de bastalady.
Abaı atyndaǵy Qazaq ulttyq opera jáne balet teatrynda (Qabanbaı batyr, 110) 2 mamyr kúni saǵat 18:00-de Qazaqstan halqynyń birligi kúnine arnalǵan kesh ótedi.
«BUNKER» art-mekeninde 3 mamyr saǵat 16:00-de eseıgen shaqtaǵy kúrdeli suraqtarǵa jaýap izdeıtin «Balyqtar uıyqtaı ma?» atty dramalyq týyndy kórsetiledi.
Kıno
Qala kınoteatrlary kórermenderge álemdik jáne otandyq týyndylardy usynady:
* «Ázázil Prada kıedi 2» — áıgili hıkaıanyń kópten kútken jalǵasy. Oqıǵa araǵa 20 jyl salyp órbıdi, basty keıipkerler Mıranda men Endı áleýmettik jeliler men blogerler dáýirinde óz ornyn tabýǵa tyrysady.
* «Men úshin ómir súr» — komedııalyq saryny bar, otbasylyq qundylyqtardy dáripteıtin jańa qazaqstandyq drama.
* «Grýzovıchkı» (Júk kólikteri) — balalarmen birge tamashalaýǵa arnalǵan mýltfılm.
Eske salaıyq, buǵan deıin Almatyda Qazaqstan halqynyń birligi kúni qalaı atap ótiletinin jazǵanbyz.
