Mýzeıler men kitaphanalarǵa tabys tabýǵa múmkindik beriledi
NUR-SULTAN. QazAqparat - Qazaqstanda mýzeıler men kitaphanalarǵa tabys tabýǵa múmkindik beriledi. Bul týraly Senattyń jalpy otyrysynda QR Mádenıet jáne sport mınıstri Aqtoty Raıymqulova aıtty, dep habarlaıdy QazAqparat tilshisi.
«Qoldanystaǵy «Mádenıet týraly» zańda mýzeıler men kitaphanalar iske asyrýǵa quqyly aqyly qyzmet túrleriniń tizimi jáne olardan paıda tabý tártibi qarastyrylǵan. Tizim sol kezde memlekettik mekeme nysanynda jumys istegen kitaphanalar men mýzeılerge quqyq berý úshin zańǵa engizilgen bolatyn. Bıýdjet zańnamasynyń talaptaryna sáıkes, eger aqyly qyzmetter quqyǵy salalyq zańdarda kózdelmese kommertsııalyq emes bolyp tabylatyn memlekettik mekemelerdiń nysanynda qurylǵan uıymdardyń bundaı qyzmetke quqyǵy joq«, - dedi «Qazaqstan Respýblıkasynyń keıbir zańnamalyq aktilerine mádenıet máseleleri boıynsha ózgerister men tolyqtyrýlar engizý týraly» QR Zańynyń jobasy jóninde baıandama jasaǵan mınıstr.
Alaıda, onyń aıtýynsha, búgingi kúni Qazaqstannyń kóptegen mýzeıleri memlekettik kásiporyndarǵa aınalǵan. Osy oraıda, qoldanystaǵy zańda mýzeıler men kitaphanalarǵa tabys tabýǵa múmkindik beretin norma kásiporyndardyń aqyly qyzmetter kórsetý aıasyn shektep otyr.
«Osyǵan oraı zań jobasynda osy normanyń qoldanylýyn mekemeler túrinde qurylǵan uıymdarǵa ǵana qoldaný usynylyp otyr. Kásiporyndar «Memlekettik múlik týraly» Zańynyń talaptarynyń aıasynda iske asyratyn bolady. Sonymen qatar, osy zań jobasy aıasyndaǵy eń mańyzdy normalardyń biri, ol memleket júz paıyz qatysatyn uıymdardy jekeshelendirýge tyıym salatyn túzetý bolyp tabylady», - dedi Aqtoty Raıymqulova.
