Mýzeıde ótetin sabaqtar úshin ata-analar aqsha tólemeıdi - Saǵadıev
ASTANA. QazAqparat - Úkimettiń búgingi otyrysynda QR Bilim jáne ǵylym mınıstri Erlan Saǵadıev jańa oqý jylynan bastap birqatar pánder mýzeılerde ótkiziletinin málimdegen bolatyn. Osy oraıda ol «jergilikti ákimdikter mýzeılerge barý aqysyn tóleý mexanızmin ázirleýi kerek» degendi aıtyp qaldy, dep xabarlaıdy QazAqparat tilshisi.
«Endi, mýzeılerde sabaqtar ótse, mektep oqýshylarynyń kóptep keletini belgili. Árıne, mýzeılerdiń aqshasy bolmasa, ózderine qıyn bolady. Óıtkeni barlyq balalardy qabyldaý qajet. Osyǵan baılanysty tóleý mexanızmin engizý kerek dep otyrmyz. Ata-analar eshqandaı aqsha tólemeıdi. Mektep ózi uıymdastyrady. Sondyqtan (mýzeıdegi sabaqtar úshin - avt.) tek qana mektep tóleýi tıis. Al mektepke ákimshilik aqshasyn berýi kerek. Balalarǵa eshqandaı salmaq túspeıdi», - dedi Saǵadıev QazAqparat tilshisine bergen suxbatynda.
Aıta keteıik, bıyldan bastap geografııa, dúnıetaný jáne Qazaqstan tarıxy sabaqtaryn keminde eki saǵattan mýzeılerde ótkizý josparlanyp otyr.
«Árıne, bul is-sharalar tek qana jaǵdaıy bar jerlerde ótkiziledi. Degenmen, Qazaqstannyń mýzeıleri kúzge deıin daıyn bolýy kerek. Sonyń ishinde oqýshylar otyratyn oryndardy daıyndap, mýzeılerdi qajetti texnıkalyq quraldar - proektorlar men ınteraktıvti taqtalarmen qamtamasyz etý kerek. Joǵary oqý oryndaryna qarasty zertteý ınstıtýttarynyń mýzeılerin biz ózimiz daıyndaımyz. Birqatar oblys ákimderimen osy másele talqylandy. Bul jumysty ótkizý úshin jergilikti ákimdikter mýzeılerge barý aqysyn tóleý mexanızmin ázirleýi tıis", - dep atap kórsetti mınıstr .
