Mýzeı túni: Aqtóbelik sheber qamshy toqýdy úıretip, jyrshylar dastandardyń shyǵý tarıhyn aıtty

Aqtóbe «sary» aımaqta bolǵanymen kópshilik jınalatyn sharany ótkizýge ruqsat joq. «Mýzeı túni» de karantın shekteýine baılanysty onlaın ótti. Aldymen dástúrli «Jádiger jerde qalmasyn» aktsııasy ótti.

Tikeleı efır kezinde qala turǵyndary Oralbaı Elýbaıuly, Baǵdagúl Tóleýtaeva qundy jádigerdi jáne №55 orta mektep-gımnazııasy dırektorynyń orynbasary Berik Satmaǵanbetov batyr Sapýra Mátenqyzyna arnalyp jasalǵan pılon-stellanyń kóshirmesin mýzeı qoryna tapsyrdy.

Sondaı-aq, shara aıasynda «Mýzeıdegi qor isi máseleleri men sheshimderi» aýdandyq mýzeılerge arnalǵan ǵylymı-ádistemelik onlaın-semınary, «Aqtóbe óńiriniń jyrshy, jyraýlary» taqyrybynda onlaın-kezdesý ótti. Al qolóner sheberi Erqosaı Ábilov qamshy toqý jolyn kórsetti.

«Júgen, ómildirikke 12 órimdi at ábzelin daıyndaýǵa bolady. Qaıystan toqý ádisi qıyn bolǵanymen zeıindi adam ony tez ıgerip ketedi. Er toqym daıyndap, mýzeılerge bergen edim. Qazir qundy jádigerler qatarynda tur. Mýzeıdegi sharaǵa súıek sapty qamshyny ala keldim. Ulym úılengende dombyra ekeýin syıǵa tartqan edim. Qoıdyń asyq jiliginen jasalǵan. Ózim súıekten kóp zat jasadym. Birneshe halyqaralyq kórmege qoıdym. Mýzeı túni bárin kórsetip, halyqqa tanystyrýǵa múmkindik jasaldy. Ónerge degen súıispenshiligimiz sarqylmasyn»,- dedi Erqosaı Ábilov.
«Siz bilesiz be?» tabıǵat álemine saıahat onlaın vıktorınasy ótip, «Qazaǵymnyń ánderi-aı» atty karaokemen ánder shyrqaldy. Sonymen birge «Altyn adam», «Rýhanııat», «Ólke tabıǵaty» zaldary boıynsha onlaın ekskýrsııa júrgizildi.

«Rýhanııat» zalynda oblystyq Nur- Ǵasyr meshitiniń tarıhynan syr shertetin fotokórme bar. Meshit qurylysy 2006 jyly 22-sáýir kúni bastaldy. 2008 jyly qoldanysqa berilip, oǵan Elbasy qatysty. Táýelsizdiktiń 20 jyldyǵyna oraı oblystyq «Rýhanııat» mýzeıi ashyldy. Sonymen birge mýzeıde sheber Erqosaı Ábilov pen Bolat Atyraýbaevtyń qolynan shyqqan, tarıhı negizi saqtalyp jasalǵan buıymdar saqtaýly»,- dep tanystyrdy mýzeı qyzmetkeri.