Mýzeı túni: Aktsııa kezinde murajaıdyń bar ekenin bilmeıtinder kezdesedi - qyzmetker

Bıyl «Mýzeı túni» aktsııasy «Baqytty bala» jobasy aıasynda ótti. Álııa Moldaǵulova mýzeıi soǵys jyldarynda qoldanylǵan zattar men kıimderdi, qarý-jaryqty shyǵardy. Kelýshilerdiń kóbi qarýdy ustap kórip, onyń myqtylyǵyn tekserip kórgisi keledi.

«Jaýyngerlerdiń as ishetin ydysy, plastınka, kaska, jarylǵysh zattardyń qaldyǵy ákelindi. Kóbin izdeý toby arnaıy ákelip beredi. Bári 1988 jyldan beri jınalyp tur. Mýzeıde 100-den astam jádiger bar. Áli de ata-anasynyń qoldanǵan zattaryn, arnaıy toptyń tapqan zattary tapsyrylady. Kelýshiler qarýǵa qyzyǵady, ustap kórýge tyrysady. Biz búgin 1940 jyldardaǵy qarýdy ákeldik»,- dedi Álııa Moldaǵulova mýzeıiniń bas qor saqtaýshysy Aısulý Turalıeva.

Aıta keteıik, bul mýzeıde Álııa Moldaǵulovaǵa Keńes odaǵynyń batyry ataǵy berilgen gramotasy saqtaýly. Sonymen qatar, mekteptegi úlgerim tabeli bar.

«Mektep oqýshylary, stýdentter jıi keledi. Sheteldik qonaqtar da Álııa Moldaǵulovanyń ómirimen tanysady. Biraq múlde mýzeıge kelmegen aqtóbelikter áli bar. Olar «Mýzeı túni» aktsııasy kezinde tanysyp, bar ekenin biledi. Keıbiri bala kezinde kelip, qartaıǵanda sony eske alady», - dedi Aısulý Týralıeva.

Al taǵy bir zalda oblystyq tarıhı-ólketaný mýzeıi qyzmetkerleriniń daıyndaǵan músini bar. Músinniń bári skochtan jasalyp, shammen jaryqtandyrylǵan.

«Músindi skochtan bir apta daıyndadyq. Aldymen manıken arqyly jasap, keıbiri mýzeı qyzmetkerleriniń músini bolyp shyqty. Aldymen paketti orap, keıin skochtaımyz. Músin shyqqan kezde ony tóbege ilip, arnaıy shammen jaryqtandyryldy. Ótken jyly tek qol, aıaq sekildi adamnyń belgili bir dene bóligin jasaǵanbyz. Bıyl tolyq beıne ázirlendi»,- dedi oblystyq mýzeıdiń ǵylymı qyzmetkeri Іńkár Álibekova.

Sonymen qatar, jergilikti qolóner sheberleri ózderi daıyndaǵan buıymdardy tanystyryp, satýǵa shyǵardy.