Mýzeı túni: Ulttyq mýzeı astanalyqtardy nesimen qýantady
ASTANA. KAZINFORM – Dástúrge saı 18 mamyrda saǵat 18:00-00:00 aralyǵynda Qazaqstan Ulttyq mýzeıinde halyqaralyq mýzeıler kúnine arnalǵan «Mýzeı túni» aktsııasy sheńberinde «Mýzeı – qundylyqtar mekeni» atty mádenı-tanymdyq is-shara ótedi.
Іs-sharanyń maqsaty – rýhanı-mádenı qundylyqtardy, halqymyzdyń tarıhyn, mádenıetin bir keńistikke biriktire otyryp, ár túrli janr men stıldegi óner týyndylaryn usyný. Mýzeı qyzmetin, ondaǵy eksponattar men jádigerlerdi keńinen nasıhattaý.
Bul kúni tańǵy saǵat 10:00-nan bastap «Baldyrǵan gıd» sholý ekskýrsııalary, Ulttyq mýzeıdiń ǵylymı jobalar aıasynda jaryq kórgen kitaptardyń tusaýkeseri, kartına men músin týyndylaryna kóshirme jasaýdan sheberlik synyby men Ulttyq mýzeıdiń jobalary aıasyndaǵy mýzeılik sabaqtar ótedi.
Saǵat 16:00-de QR Sýretshiler Odaǵynyń múshesi Rafael Slekenovtiń «Táńir nury» atty jeke kórmesi ashylady.
Saǵat 18:00-den bastap mýzeı qonaqtaryna Roza Baǵlanova atyndaǵy «Qazaqkontsert» memlekettik kontserttik uıymynyń kontserti, qolónershiler jármeńkesi, «Dala keskindemesi: rámizder, boıaýlar, beıneler» men «Erlikke taǵzym – eldiktiń belgisi» kórmeleri, Ulttyq mýzeıdiń Konservatsııa jáne qalpyna keltirý qyzmetiniń sheberlik sabaqtary, «Mýzeı qoryndaǵy ataqty tulǵalar dombyrasynyń únin jańǵyrtý» atty lektsııa-kontsert usynylady.
Sonymen qatar kórermen úshin teatrlandyrylǵan ekskýrsııa, «Juldyzdy gıd. 10 juldyz. 10 jaýhar» shoý-jobasy uıymdastyrylady.
Atalǵan mádenı is-shara Ulttyq mýzeıde dástúrli túrde uıymdastyrylyp keledi. Ótken jyly kelýshiler sany 48 myńǵa jýyqtady.
Aıta keteıik, «Halyqaralyq mýzeı kúni» merekesi 1977 jyly halyqaralyq mýzeıler keńesiniń bas konferentsııasynda bekitilgen. Sol jyly alǵashqy «Mýzeı túni» is-sharasy Berlın qalasynda ótti.
