Mýzeı salasyn monetızatsııalaýdyń jańa tetikteri engiziledi

ASTANA. QazAqparat – Mýzeı salasyn monetızatsııalaýdyń jańa tetikteri engiziledi. Bul jaıynda elimizdiń Mádenı saıasatynyń tujyrymdamasyn tanystyrǵan Mádenıet jáne sport mınıstri Ashat Oralov málim etti, dep habarlaıdy QazAqparat tilshisi.

«Mýzeı isin damytý ozyq tehnologııalardy engizý arqyly júrgiziledi. Mysaly – respýblıkalyq jáne óńirlik mýzeı qorlaryn elektrondy formatqa kóshirý, sondaı-aq ekspozıtsııalardy vırtýaldy formatta qoljetimdi etetin 3D týrlar qurý. Mýzeıge kelýshiler sanyn arttyrý maqsatynda túrli is-sharalar uıymdastyrylady. Mysaly – Halyqaralyq mýzeıler kúnine oraılastyrylatyn jyl saıynǵy «Mýzeıler túni» aktsııasy. Bizdiń maqsatymyz – 2030 jylǵa qaraı tarıhı-mádenı mura mýzeıleri men nysandaryna kelýshiler sanyn 20 paıyzǵa ulǵaıtý», - dep jazady mınıstr Telegram paraqshasynda.

Onyń atap ótýinshe, mýzeı salasyn monetızatsııalaýdyń jańa tetikterin engizý boıynsha jumys júrgizilip jatyr.

«Atap aıtqanda, kádesyılar satý, bıletterdiń saralanǵan baǵasy, aýktsıondar, sándik-qoldanbaly óner aımaqtary, kovorkıngter jáne taǵy basqalardy. uıymdastyrý úshin mýzeılerdiń bos alańdaryn paıdalaný múmkindigi qarastyrylýda», - dedi ol.