Elde mýzeı salasyn damytý tujyrymdamasy ázirlenip jatyr

— Qazir Mýzeı salasyn damytýdyń biryńǵaı zamanaýı tujyrymdamasynyń jobasy ázirlenip jatyr. Onda taqyryptyq mýzeı qorlaryn tsıfrlandyrý, ekspozıtsııalyq zaldardy jańartý, ınteraktıvti jáne taqyryptyq mýzeılerdi damytý, jas urpaqqa ulttyq tarıh pen mádenıetti tıimdi nasıhattaý sharalary qamtylatyn bolady. Sondaı-aq Qyzylorda oblysyndaǵy «Rýhanııat ortalyqtary» tájirıbesi tujyrymdama jobasy aıasynda qaralyp, pysyqtalady. Jalpy Úkimet qabyldaıtyn barlyq shara Qazaqstan Respýblıkasynyń jańa Konstıtýttsııasynyń erejeleri aıasynda elimizdiń tarıhı-mádenı murasyn saqtaý qundylyqtaryn is júzinde iske asyrýǵa baǵyttalǵan, — dedi Úkimet basshysy jaýabynda.

Onyń atap ótýinshe, mýzeılerdiń ınternet-resýrstaryn úsh tilde sapaly kontentpen tolyqtyrý, termınologııalyq birizdilikke sáıkes jańartý jáne onlaın-qoljetimdilikti arttyrý boıynsha naqty sharalar iske asyrylyp jatyr. 

— Bul rette elimizde mádenı kontent usynýdyń jańa sapaly deńgeıin qalyptastyratyn «Qazaqstan mýzeıleriniń vırtýaldy jelisi» — «E-museum» veb-portaly jumys jasaýda. Onda Qazaqstannyń 284 mýzeıi týraly málimetter, 15 mýzeıdiń 3D vırtýaldy týrlary, 700 eksponattyń 3D modelderi, Memlekettik mýzeı qorynyń katalogyna 66 myńnan astam eksponat boıynsha aqparat júkteldi. Atalǵan júıe mýzeı qoryn ortalyqtandyrylǵan túrde tolyq esepke alýǵa, onyń ishinde altyn buıymdardy tirkeý, saqtaý jáne ǵylymı aınalymǵa engizý protsesterin tıimdi uıymdastyrýǵa, mýzeı qyzmetin avtomattandyrýǵa, ekspozıtsııalar men qorlardy basqarýdyń ashyqtyǵyn qamtamasyz etýge, halyqaralyq standarttarǵa sáıkestendirýge múmkindik beredi, — dedi Oljas Bektenov.

Aıta keteıik, qazir respýblıka boıynsha 285 mýzeı jumys isteıdi. Olardyń qatarynda 5 respýblıkalyq mýzeı, 12 mýzeı-qoryq, 15 óńirlik tarıhı-ólketaný, 71 memorıaldyq jáne 16 kórkemóner mýzeıi, sondaı-aq qalalyq, aýdandyq jáne aýyldyq mýzeıler bar.