Muzdyqtardyń jyldam erýi sý teńgerimin buzyp, tabıǵı apattar qaýpin arttyrady – Emomalı Rahmon
ASTANA. KAZINFORM – Muzdyqtardyń jyldam erýi sý teńgerimin buzyp, tabıǵı apattar qaýpin arttyrady. Bul týraly elordada ótip jatqan Óńirlik ekologııalyq forýmda Tájikstan Prezıdenti Emomalı Rahmon aıtty.
- Sammıt klımattyń ózgerýi, ekojúıelerdiń tozýy, sý resýrstarynyń tapshylyǵy jáne tabıǵı apattar óńirimiz úshin de, búkil álem úshin de kúrdeli syn-qaterge aınalǵan jaǵdaıda ótip jatyr. Bul bizden úılesimdi ári birlesken is-qımyldy talap etetini sóziz. Bilesizder, Ortalyq Azııadaǵy sý resýrstarynyń 60 paıyzǵa jýyǵy bizdiń elimizdiń aýmaǵynda qalyptasady. Bul Tájikstannyń taý ekojúıesiniń óńirdi sýmen qamtamasyz etýdegi jáne turaqty damýdaǵy mańyzdy rólin aıqyndaıdy, - dedi ol.
Osy rette Tájikstan Prezıdenti muzdyqtardyń jedel erýi men qar resýrstarynyń azaıýy erekshe alańdaýshylyq týǵyzatynyn aıtty.
- Tájikstandaǵy 14 myń muzdyqtyń 1 300-den astamy tolyq erip ketken. Muzdyqtardyń jyldam erý úrdisi búkil álem boıynsha kúsheıip keledi. Bul sý teńgeriminiń buzylýyna, qorshaǵan ortaǵa qaýipterdiń týyndaýyna jáne sýmen baılanysty tabıǵı apattar qaýpiniń artýyna ákeledi, - dedi Emomalı Rahmon.
Sonymen qatar ol óńirdegi shańdy daýyldardyń jıiligi men uzaqtyǵynyń artýy da alańdatarlyq úrdis ekenine nazar aýdartty.
- Olar halyqtyń densaýlyǵyna jáne qorshaǵan ortaǵa teris áser etedi. Tek ótken jyly Tájikstanda 60-tan astam shańdy daýyl oqıǵasy tirkeldi. Olardyń jalpy uzaqtyǵy shamamen 7 aı boldy. Mundaı buryn bolǵan emes. 90-jyldardyń basynda mundaı tabıǵı qubylys jylyna nebári 2-3 ret qana bolatyn, - dedi ol.
Aıta keteıik, birneshe eldiń Prezıdenti qatysyp jatqan Óńirlik ekologııalyq sammıt «Ornyqty bolashaqqa ortaq kózqaras» taqyrybymen ótip jatyr.
