«Muzdyqtardan fermalarǵa»: Qazaqstan men ADB jańa ekologııalyq jobalardy pysyqtaıdy
ASTANA. KAZINFORM — Sý resýrstary jáne ırrıgatsııa mınıstrligi men Azııa damý banki jańa nysandardyń qurylysy men muzdyqtardyń erýine qarsy kúresti talqylady, dep habarlaıdy vedomstvonyń baspasóz qyzmeti.
Sý resýrstary jáne ırrıgatsııa mınıstri Nurjan Nurjigitov Azııa damý bankiniń (ADB) Ortalyq jáne Batys Azııa boıynsha bas dırektory Gennadıı Jýkovpen kezdesti.
Taraptar halyqaralyq qarjy uıymynyń Qazaqstannyń sý sharýashylyǵy ınfraqurylymyn salý jáne rekonstrýktsııalaý jobalaryna qatysý múmkindigin talqylady. Qazirgi tańda Sý resýrstary jáne ırrıgatsııa mınıstrligi ADB-ǵa ázirlenip jatqan jobalar tizimin usyndy. Kelesi aıda halyqaralyq qarjy uıymynyń sarapshylary bul jobalardy jan-jaqty talqylaý úshin Qazaqstanǵa keledi.
Sondaı-aq mınıstr ADB óńirlik basshylyǵymen «Muzdyqtardan fermalarǵa» halyqaralyq baǵdarlamasy sheńberinde muzdyqtardy saqtaý jáne olardyń erýine turaqtylyqty kúsheıtý, sonyń ishinde ırrıgatsııalyq jelilerdi jańǵyrtý jónindegi sharalardy kózdeıtin yntymaqtastyq múmkindikterin talqylady.
— Biz uzaqmerzimdi ári eki tarapqa da tıimdi yntymaqtastyqqa úmit artamyz. Mınıstrlik sý sharýashylyǵy ınfraqurylymyn keshendi túrde jańǵyrtý jobalaryn ázirlep jatyr. Osy jobalardy júzege asyrý úshin biz halyqaralyq qarjy ınstıtýttaryn keńinen tartyp jatyrmyz jáne Sý salasyn damytý jónindegi áriptesterdiń úılestirý keńesi aıasynda belsendi jumys júrgizip kelemiz, — dedi Sý resýrstary jáne ırrıgatsııa mınıstri Nurjan Nurjigitov.
Buǵan deıin mınıstrlik Frantsııa mamandarymen birlesip Balqash kóli basseınine zertteý júrgizdi.