Muzdaı qarýlanyp, «Astana bizdiki» dep vıdeoǵa túsken jigit sotqa tartylyp jatyr
NUR-SULTAN. QazAqparat – Elordada muzdaı qarýlanyp, «Astana bizdiki» dep vıdeoǵa túsken jas jigittiń soty bastaldy, dep habarlaıdy QazAqparat tilshisi.
«Sotta aıyptalýshynyń jazasyn aýystyrý týraly materıal qaralýda. Ol buryn sotty bolǵan. Keıin qylmystyq zańnamany izgilendirýge baılanysty bosap shyqqan. ıAǵnı, jazasynyń ótelmegen bóligi shartty jazaǵa aýystyrylǵan. Sot tarapynan oǵan túzelýge múmkindik berilgen. Soǵan qaramastan, ol bostandyqta júrip, qylmysqa jol berip otyr (qarý ustap taralǵan vıdeo – avt.)», - dep habarlady QazAqparat tilshisine Nur-Sultan qalasy Baıqońyr aýdandyq №2 sotynyń baspasóz qyzmetinen.
Aýdandyq sottyń málimetinshe, sońǵy jasalǵan zańbuzýshylyq boıynsha qylmystyq is qozǵalyp, tergeý amaldary júrip jatyr.
«Búgingi sotta qaralyp jatqan másele – onyń ótelmegen jazasynyń bóligin meılinshe qatań jazaǵa aýystyrý. Sotta osyndaı ótinish qaralýda. Al vıdeoǵa qatysty is materıaldary sotqa áli kelip túsken joq», - dep habarlady sottan.
Eske sala ketsek, elorda saqshylary «baqaıshaǵyna deıin qarýlanǵan» jigittiń kim ekenin anyqtap, kóp ótpeı ustaǵan bolatyn.
Onyń aldynda «Astana-sergek» Instagram paraqshasynda jas jigittiń qarý ustap, «Astana bizdiki» degen vıdeosy tarady. Vıdeoda jas jigit birneshe qarýdy ustap, bylapyt sózder aıtady.
