Muzdaq kólderden 3 mln tekshe metr sý buryldy: sel qaýpi seıildi me
ASTANA. KAZINFORM — 2026 jylǵy sel qaýpi kezeńinde jarylý qaýpi bar muzdaq kólderden shamamen 3 mln tekshe metr sý baqylanatyn túrde buryldy, dep habarlaıdy Tótenshe jaǵdaılar mınıstrliginiń baspasóz qyzmeti.
QR TJM halyq pen ınfraqurylym nysandaryn sel qaýpinen qorǵaýǵa baǵyttalǵan aldyn alý sharalary keshenin júrgizip jatyr. Táýlik boıy 15 asa qaýipti kólge baqylaý júrgizildi. Sý deńgeıin retteý úshin mamandar shamamen 50 sıfon qubyryn ornatty. Sý kólemi belgilengen qaýipsiz deńgeıge deıin tómendegennen keıin sıfondardyń basym bóliginiń jumysy toqtatyldy. Qazirgi ýaqytta № 9 Aqsaı jáne № 19 Talǵar kólderinde sý burý jumystary jalǵasyp jatyr.
9 qyrkúıekte TJM «Qazseldenqorǵaý» MM qyzmetkerleri ǵalymdar jáne beıindi mamandarmen birlesip, Іle Alataýynyń soltústik betkeıinde Uzynqarǵaly ózeni basseıninen Túrgen ózenine deıingi aýmaqta áýeden vızýaldy tekserý júrgizdi.
— Tekserý nátıjesinde taýly aımaqtardaǵy sel jaǵdaıy turaqty ekeni anyqtaldy. Muzdaq kólderdiń basym bóliginde sý deńgeıiniń maýsymdyq tómendeýi baıqalady. Muzdyqtardan keletin erigen sý aǵyny aıtarlyqtaı azaıǵan. Muzdyq protsesteriniń belsendiligi men sel qaýpiniń joǵarylaý belgileri anyqtalǵan joq. Yqtımal qaýipti ýchaskeler táýlik boıy baqylaýda. Bul úshin avtomattandyrylǵan júıeler, beınebaqylaý jáne gıdrometeorologııalyq datchıkter qoldanylady. Mamandar 852 jerústi tekserý júrgizdi. Áýeden taǵy 17 tekserý oryndaldy. Jumys sel qaýpi kezeńi aıaqtalǵanǵa deıin jalǵasady, — delingen habarlamada.
Qazaqstannyń TJM sel qaýpi týraly eskertý alǵan jaǵdaıda shuǵyl qyzmetterdiń nusqaýlaryn qatań saqtaý, ózen arnalary men taý shatqaldaryna jaqyndamaý, sondaı-aq evakýatsııalaýdyń qaýipsiz baǵytyn aldyn ala anyqtaý qajettigin eskertedi.
Buǵan deıin Almatyda sel qaýpiniń aldyn alý maqsatynda muzdaq kólderdiń jaı-kúıin táýlik boıy baqylaıtyn bes bıik taýly maýsymdyq baqylaý beketi jumysyn bastaǵanyn jazǵanbyz.
