«Muzbalaq» mýltfılminiń saýndtregine klıp túsirildi

ASTANA. QazAqparat - Sh.Aımanov atyndaǵy «Qazaqfılm» kınostýdııasynyń óndirisindegi «Muzbalaq» tolyqmetrli kórkem anımatsııalyq fılminiń saýndtregine arnalǵan klıp jarııalandy, dep habarlaıdy QazAqparat kınostýdııanyń Feısbýktegi paraqshasyna silteme jasap.

Mýzykalyq klıptegi ándi oryndaýshy ári avtory Ushqyn Jamalbek.

Aıta keterligi,  65 mınýttyq kórkem anımatsııalyq fılmge ázirlikti anımator-rejısserler Tilek Tileýǵazy men Turdybek Maıdan 2015 jyldyń qyrkúıeginde qolǵa alǵan.

Al, «Muzbalaqtyń» treıleri jyldyń basynda jarııalandy.

Fılm boıynsha 40-qa jýyq otandyq anımator jumys istedi. Mýltfılm 2D jáne 3D formatynda túsirilgen jáne ár sekýndynda 24-25 kadr sýret salynǵan. Keıipkerlerdi dybystaýǵa Erjan Jarylqasynuly, Janat Tynybaev, Samat Qordabaı, Erǵalı Tólebaev, Alma Ádilqyzy esimdi teatr jáne kıno akterleri qatysqan.

Búrkit pen adamnyń dostyǵy týraly baıandaıtyn bul mýltfılm QR Mádenıet jáne sport mınıstrliginiń tapsyrysy boıynsha túsirilgen.

Esterińizge sala keteıik, kınostýdııa byltyr tolyqmetrajdy eki anımatsııalyq fılm shyǵardy. Sonyń biri «Muzbalaq» bolsa, ekinshisi rejısser Adaı Ábildanyń tarıhı tulǵa, qolbasshy Kúltegin týraly kartınasy. Atalǵan fılmder tolyqqandy aıaqtalǵan jáne prokaty men tusaýkeseri ústimizdegi jylǵa josparlanǵan.