«Muzbalaq» Chehııada balalarǵa kórsetiledi
ALMATY. QazAqparat - Rejısser Turdybek Maıdan men Tilek Tóleýǵazynyń «Muzbalaq» atty tolyqmetrajdy anımatsııalyq fılmi, Chehııanyń Zlın qalasynda ótetin 59-shy balalar men jasóspirimderge arnalǵan fılmder HKF «Panorama» atty konkýrstan tys baǵdarlamasynda kórsetiledi, dep habarlaıdy QazAqparat «Qazaqfılm» kınostýdııasyna silteme jasap.
Festıval 2019 jylǵy mamyrdyń 24 men maýsymnyń 1 aralyǵynda ótedi.
Zlin Film Festival balalar fılmderine arnalǵan álemdegi eń eski ári aýqymdy kınofestıval. Festıval aıasyndaǵy kórsetilimder Zlın qalasynan bólek Chehııanyń basqa da qalalarynda ótedi. Jyl saıyn festıval aıasynda 50-den astam elden kelgen 300-ge jýyq fılm kórsetiledi. 2010 jyldan bastap festıvaldi tamashalaýǵa 95 myńnan astam eresek pen kishkentaı balalar kelgen.
«Muzbalaq» anımatsııalyq fılmi qazaqtyń ǵasyrlar boıy qalyptasqan saıatshylyq mádenıeti jáne adam men búrkit arasyndaǵy dostyq týraly baıandaıdy.
«Álem kıno keńistigine qazaq anımatsııasynyń jetistikteri týraly jar salatyn kez keldi. Biz sol úshin de eńbek etemiz. Bizdiń árbir jasaǵan týyndymyz aýqymdy kınofestıvalge qatysýy tıis. «Muzbalaq» bıik belesterdi baǵyndyrýyna tilektespin», - dedi «Qazaqfılm» AQ anımatsııalyq birlestiginiń jetekshisi Adaı Ábildınov.
Esterińizge sala keteıik, «Muzbalaq» byltyr QR Kınematografısteri odaǵynyń «Qulager» júldesinde, «Úzdik anımatsııalyq fılm» nomınatsııasy boıynsha jeńimpaz atanǵan. Sonymen qatar, XVII «Alaý rýhy» Halyqaralyq kınematografııalyq debıýtter kınofestıvaliniń balalar jáne jasóspirimder fılmderi konkýrstyq baǵdarlamasyna qatysqan (Hanty-Mansıısk, RF).
Eske sala ketsek, Naýryz merekesi qarsańynda astanada 6 myńǵa jýyq búldirshinge «Muzbalaq» anımatsııalyq fılmi tegin kórsetilgen bolatyn.
