«MýzArt» tobynyń 15 jyldyqqa baılanysty qupııa josparlary belgili boldy
ALMATY. QazAqparat - «MýzArt» tobynyń prodıýsseri Erlan Júnisbaı ánshilerdiń jańa 2017 jyldy qalaı qarsy alǵaly otyrǵanyn aıtty, dep habarlaıdy QazAqparat tilshisi.
«Jańa jylda jigitter otbasymen bolmaq. Bul, jalpy, bizdiń prıntsıpti ustanymymyz. Jumys istemeımiz», - dep kesip aıtqan Erlan Júnisbaı toptyń Jańa jyldan keıingi josparymen de bólisti.
«Jańa jyldan keıin biz toptyń qurylǵanyna 15 jyl tolýyna baılanysty 2 aıǵa demalys jarııalap otyrmyz. Naýryzǵa deıin. Bul ýaqytta «MýzArt-Laıf» mega-jobasynyń jeńimpazdarymen jumys jasap, jańa ánder jazamyz», - dedi ol.
Sóz sońynda Erlan Júnisbaı «QazAqparat» oqyrmandaryn Jańa jylmen quttyqtap, sáttilik tiledi.
