Muz jarylyp ketken — Atyraýlyq polıtseıler jasóspirim qyzdy qutqardy
Atyraý qalasynda ortalyqqa jaqyn mańda Jaıyq jaǵalaýynda qyz bala muz oıylyp, sýǵa túsip ketken, dep habarlaıdy Kazinform.
Habarlama boıynsha Patrýldik polıtsııa batalonynyń qyzmetkerleri Ǵapý Janarys, Arsen Mýratov, Qurmanǵazy Mereı jáne Ákimshilik polıtsııa bólimi ınspektory Armanbek Gabıtov dereý oqıǵa ornyna jetken.
Muz oıyǵynan basy ǵana kóringen adamnyń áıel adam ekendigin daýysynan ǵana aıyrǵan polıtseıler qutqarýǵa birden kirisken.
Janarys Ǵapý beline arqan jip baılap muz ústimen jasóspirimge qaraı bettedi. Áriptesi Mereı Qurmanǵazy oǵan kómektesý úshin jip boıymen birge júrdi. Ózge polıtseıler jaǵada Janarys Ǵapýdy sýǵa batyp bara jatqan qyz balamen birge tartyp shyǵarýǵa daıyn turdy.
Aıaqasty adam ómirine arasha túsken polıtseılerdiń qyraǵylyǵy men eptiligi nátıjesinde jasóspirim jaǵaǵa shyǵarylyp jedel-járdemmen aýrýhanaǵa jetkizildi. Denesi qatty sýyqtaǵan jasóspirim mán-jaıdy túsindire almady.
Jedel-tergeý toby tıisti sharalardy bastap ketti.
Aıta keteıik, dál osyndaı jaǵdaı Atyraý oblysynda 26 jeltoqsan kúni de bolǵan edi. Ol joly polıtseıler muz jarylyp, sýǵa túsip ketken áıel men oǵan kómektespek bolǵan er adamdy qutqarǵan edi.
