Muz ústinde qandaı qaýipsizdik talaptaryn saqtaý kerek
NUR-SULTAN. QazAqparat – Nur-Sultan qalasy Tótenshe jaǵdaılar departamenti qysta muz ústinde qater tóngen adamdy qutqarý qalaı júrgiziletinin aıtyp berdi, dep habarlaıdy QazAqparat tilshisi.
Qysqy qutqarý quraldaryna mynalar jatady:
Qutqarý taqtasynyń uzyndyǵy - 5-8 metr, eni - 120 sm. Bir ushynda ilmek, ekinshi ushynda uzyndyǵy 30-dan 40 metrge deıin arqan bekitiledi. Qutqarýshylar jaǵada arqannyń ushyn qozǵalmaıtyn zatqa baılaıdy, sodan keıin muz ústimen zardap shegýshige qaraı jyjıdy jáne oǵan taqtanyń ushyn ilmekpen beredi. Osy arqyly sýdan shyǵýǵa kómektesedi.
Qutqarý syryǵynyń uzyndyǵy - 5-8 metr. Onyń sońyna uzyndyǵy 40 met kapron arqan bekitiledi. Qutqarýshy jaǵaǵa arqan baılaıdy, ózi úshin qaýipsiz qashyqtyqqa jaqyndaıdy da, sýdaǵy adamǵa qaraı syryqty sozady.
Qutqarý arqanynyń uzyndyǵy-25-30 metr. Onyń eki ushynda uzyndyǵy 70 sm-ge deıin ilmekter bolady. Qutqarýshy sol qolyna ilmekti, al oń qolyna ekinshi ilmekti alyp, ony batyp bara jatqan adamǵa laqtyrady.
Qutqarý satysynyń uzyndyǵy – 3-6 metr, eni-50-70 sm. Ol shyrsha, qaraǵaı nemese dıýralıýmınıı tútikterinen jasalǵan. Qutqarýshylar qutqarý taqtasy sııaqty paıdalanady. Barlyq jaǵdaılarda qutqarýshy aldyn ala saqtandyrý sharalaryn eskergeni jón.
Aıta keteıik, sýǵa batyp bara jatqan adamǵa kómek kórsetý úshin qolda bar quraldardy qoldaný kerek. Bul turǵydabóreneler, syryqtar, shańǵylar, qalqandar, jipter, shalbar beldikteri, kıimder jáne basqa da zattar paıdalanylýy múmkin.
Paıdaly keńester:
- Eger muzdyń jetkilikti deńgeıde qalyń ekenine senimdi bolmasańyz, onyń ústimen júrmeńiz.
- Esińizde bolsyn, muz jaǵalaýda berik bolady; onyń qalyńdyǵy jaǵadan alystaǵan saıyn úlken tereńdikte, sondaı-aq ósimdikter bar nemese tez aǵatyn jerlerde juqarady.
- Muzdyń beriktigi aýa temperatýrasyna da baılanysty. Kúndiz ol tańerteń jáne keshke sııaqty berik emes.
- Muz ústimen qozǵala otyryp, qara daqtardy aınalyp ótińiz, munda muz óte juqa bolady.
- Muz ústimen júrý kezinde qalyń qar qabatymen jabylǵan ýchaskelerdi, sý jyldam aǵatyn jerler, bulaqtar, sondaı-aq butalar, ósimdikter betine shyǵatyn jerlerdi, bulaqtardyń sý qoımasyna quıylatyn jáne ónerkásiptik kásiporyndardyń jyly sarqyndy sýlary quıylatyn, muz daıyndaý júrgiziletin jáne basqa da qaýipti jerlerdi aınalyp ótý qajet.
Budan buryn habarlanǵandaı, búgin ótken brıfıngide Nur-Sultan qalalyq Tótenshe jaǵdaılar departamenti bastyǵynyń orynbasary Esen Baıyrov muz ústindegi qaýipsizdik erejelerin túsindirdi.
Sonymen qatar E.Baıyrov qaı kezden bastap ózendegi muz ústinde konkı tebýge bolatynyn aıtty.
«Sý aıdyndarynda konkımen syrǵanaý alańdaryn paıdalanýǵa muzdyń beriktigin muqııat teksergennen keıin ruqsat etiledi. Onyń qalyńdyǵy keminde 12 sm, al jappaı syrǵanaý kezinde keminde 25 sm bolýy tıis», - dedi ol.
