Muz tym juqa: SQO-da Shoqyný merekesi qarsańynda eskertý jarııalandy

PETROPAVL. QazAqparat – Soltústik Qazaqstan oblysynda qutqarýshylar pravoslav hrıstıandarynyń Shoqyný merekesine oraı turǵyndardy muz ústine toptalyp shyqpaýdy eskertti. Sebebi bıyl sý betine qatqan muzdyń qalyńdyǵy nebári 10-25 sm aspaıdy, dep habarlaıdy QazAqparat tilshisi.

Shoqyný meıramyna oraı 19 qańtar kúni SQO-da sýǵa shomylatyn 42 oryn bolady. Bul jerlerde tek oblystyq Tótenshe jaǵdaılar departamentiniń ǵana 59 mamany men 25 tehnıkasy kezekshilik atqarady. Budan basqa jergilikti atqarýshy organ ókilderi men jedel járdem qyzmeti mamandary jaǵdaıdy baqylamaq.

«Jyldaǵymen salystyrǵanda bıyl oblys aýmaǵyndaǵy ózen-kólderde muzdyń qalyńdyǵy óte juqa. Orta eseppen 10-25 sm ǵana. Buryn bul ýaqytta eń keminde 40 sm bolatyn. Osyǵan baılanysty muz ústine kóp adamnyń bir mezgilde shyǵýyna qatań tyıym salynady. Muzdyń salmaqty kótermeı jarylyp ketý qaýpi bar», - deıdi SQO TJD basshysynyń orynbasary Erik Sarybaev.

SQO Tótenshe jaǵdaılar departamenti baspasóz qyzmetiniń habarlaýynsha, byltyr meıramǵa baılanysty óńirde arnaıy jabdyqtalǵan 35 oryn ázirlendi. Muzdaı sýǵa súńgýge 35 myń adam jınalǵan. Bıyl shamamen 50 myńǵa jýyq adam keledi degen boljam bar.

«Bul kúni shomylýmen qatar barlyǵy shirkeý qyzmetkerleri arnaıy daıyndaǵan jerlerden sý alady. Osy sý alý kezinde de qaýipsizdik sharalaryn saqtaǵan durys. Biz bıylǵy muzdyń juqa bolýyna baılanysty sý alatyn jerlerge taqtaıdan joldar jasaımyz. Sol joldan syrtqa shyqpaý kerek», - deıdi Erik Sarybaev.

TJD mamandarynyń málimetinshe, sońǵy bes jylda bul meıramda jaraqat alaǵandar tirkelmegen.