«MÝZ-TV» syılyǵyn tabystaý rásiminde Batyrhan Shúkenovke erekshe nómir baǵyshtaldy
ASTANA. QazAqparat - Astanada ótip jatqan «MÝZ-TV» syılyǵyn tabystaý rásiminde Batyrhan Shúkenovke arnaıy nómir baǵyshtaldy. Sondaı-aq B. Shúkenovke Qazaqstan men Reseıdiń mýzyka ındýstrııasyna qosqan úlesi úshin arnaıy syılyǵy da tabystaldy.
Oǵan B. Shúkenovtiń týystary men dostary qatysty. 35 myńdyq «Astana-Arenada» jınalǵan barsha kórermen Batyrdyń «Nelıýbımaıa» ánin birge shyrqady. Eń alǵashynda Astanada ótetin «Mýz-TV» syılyǵyn tapsyrý rásimine «A-Stýdıo» tobynyń «altyn» quramy qatysady dep josparlanǵan bolatyn. Batyrhan solardyń arasynda bolýy tıis edi.
«Biz Batyrhan Shúkenov ómirden ozbaı turǵanda onymen sóılesip, kelisip júrgen bolatynbyz. Eń basynda «A-Stýdıo» tobynyń «altyn» quramy qatysyp, «Djýlııa» ánin shyrqasa durys bolady dep josparladyq. Óıtkeni bul án «Mýz-TV» syılyǵyn tabystaý rásiminiń negizgi ózegi edi. Biraq, ókinishke oraı, ol oıymyz iske aspaı qaldy», - dedi «Mýz-TV» Bas dırektory Arman Dáýletııarov bunyń aldynda ótken baspasóz máslıhatynda.
A. Dáýletııarovtyń aıtýynsha, «A-Stýdıo» toby men Batyrhan Shúkenov búginde Qazaqstan men Reseı mýzykalyq mádenıetiniń birigý sımvolyna aınalǵan.
«MÝZ-TV syılyǵy» - shoý-bıznestegi mańyzdy, aýqymdy jáne bedeldi oqıǵalardyń biri. Ony 2003 jyldan «MÝZ-TV» arnasy uıymdastyryp keledi. Jeńimpazdar kórermenderdiń jáne akademıkterdiń daýys berýi arqyly anyqtalady. «MÝZ-TV» syılyǵyn marapattaý sharasyna álemdik deńgeıdegi juldyzdar shaqyrtylady.
