«MÝZ-TV» syılyǵyn tabystaý rásiminde Batyrhan Shúkenovke erekshe nómir arnalady
ASTANA. QazAqparat - Bıyl 5 maýsymda Astanada ótetin «MÝZ-TV» syılyǵyn tabystaý rásiminde Batyrhan Shúkenovke arnaıy nómir baǵyshtalady. Bul týraly búgin OKQ baspasóz máslıhatynda «Mýz-TV» Reseı ulttyq mýzykalyq telearnasynyń bas dırektory Arman Dáýletııarov aıtty.
«Ókinishke qaraı, Batyrhan bul kúnge jete almady, sondyqtan biz syılyqty tabystaý rásiminde oǵan arnaıy nómir arnaımyz. Oǵan B. Shúkenovtiń týystary men dostary qatysady», - dep atap ótti A.Dáýletııarov.
Onyń aıtýynsha, eń alǵashynda Astanada ótetin «Mýz-TV» syılyǵyn tapsyrý rásimine «A-Stýdıo» tobynyń «altyn» quramy qatysady dep josparlanǵan bolatyn. Batyrhan solardyń arasynda bolýy tıis edi. «Biz Batyrhan Shúkenov ómirden ozbaı turǵanda onymen sóılesip, kelisip júrgen bolatynbyz. Eń basynda «A-Stýdıo» tobynyń «altyn» quramy qatysyp, «Djýlııa» ánin shyrqasa durys bolady dep josparladyq. Óıtkeni bul án «Mýz-TV» syılyǵyn tabystaý rásiminiń negizgi ózegi edi. Biraq, ókinishke oraı, ol oıymyz iske aspaı qaldy», - dedi «Mýz-TV» dırektory. A. Dáýletııarovtyń aıtýynsha, «A-Stýdıo» toby men Batyrhan Shúkenov búginde Qazaqstan men Reseı mýzykalyq mádenıetiniń birigý sımvolyna aınalǵan. «Árıne, Qazaqstandaǵy Mýz-TV sharasyn «A-Stýdıo» toby men Batyrsyz ótkizý óte qıyn bolaıyn dep tur. Batyrhan Shúkenov Reseı men Qazaqstannyń mýzykalyq ındýstrııasynyń bir bóligi boldy jáne solaıbolyp qala beredi», - dedi ol. «MÝZ-TV syılyǵy» - shoý-bıznestegi mańyzdy, aýqymdy jáne bedeldi oqıǵalardyń biri. Ony 2003 jyldan «MÝZ-TV» arnasy uıymdastyryp keledi. Jeńimpazdar kórermenderdiń jáne akademıkterdiń daýys berýi arqyly anyqtalady. «MÝZ-TV» syılyǵyn marapattaý sharasyna álemdik deńgeıdegi juldyzdar shaqyrtylady. Marapattaý rásimderinde óner kórsetkenderdiń qatarynda Shristina Aguilera, Katy Perry, Jennifer Lopez, Sharon Stone, 50 Cent, 30 Seconds to Mars, Tokio Hotel, Sum 41, Anastacia, Craig David, Pussycat Dolls, PSY, OLA jáne t.b. boldy.
