Muz saraıy, teatr, sport nysandary – Pavlodarda qandaı jańa ǵımarattar boı kóterdi

ASTANA. KAZINFORM – Pavlodarda áleýmettik salaǵa oblys bıýdjetiniń 51% paıyzdan astamy bólinedi. Jalpy óńirde 25,5 myń jańa jumys orny ashyldy. Jumyssyzdyq 4,8% paıyz deńgeıinde saqtalyp otyr. Bul týraly óńir ákimi Asaıyn Baıhanov aıtyp berdi. 

– Óńirde apatty mektepterdi joıý men oqýshy oryndarynyń tapshylyǵyn azaıtý maqsatynda bes jańa mektep salyndy. Qosymsha eki mektep qurylysy júrgizilip jatyr. Odan basqa óńirimizde 20 mlrd teńgeden astam qarajatqa 58 áleýmettik nysan jóndelip, 22 jańa nysan salyndy, – dedi A.Baıhanov elordada Ortalyq kommýnıkatsııalar qyzmetinde.

Munymen qosa, 32 sport alańy men kesheni ashyldy. Qazirgi tańda 11 sport nysannyń qurylysy jalǵasyp jatyr. Bul rette aýyl halqy da nazardan tys qalǵan joq, eldi mekenderde 6 birdeı sport kesheni ashylyp, Aqsý qalasynda zamanaýı Muz arenasy paıdalanýǵa berildi.

– Medıtsınalyq qyzmet sapasyn arttyrý maqsatynda 4,3 mlrd teńgege 662 jabdyq, 894,8 mln teńgege 37 sanıtarlyq kólik alyndy. Sonyń nátıjesinde medıtsınalyq uıymdardyń jabdyqtalýy 84% paıyzdan 100% paıyzǵa jetti, – dedi Asaıyn Baıhanov. 

Sondaı-aq bıyl Anton Chehov atyndaǵy drama teatry óziniń 80 jyldyq mereıtoıyn atap ótse, Ekibastuz qalasynda jańa teatrdyń ashylýy óńir mádenıetiniń órisin keńeıtti. Oblystyq mádenıet mekemeleriniń materıaldyq-tehnıkalyq bazasy jańartyldy. 

Osy jumys aıasynda Isa Baızaqov atyndaǵy oblystyq fılarmonııa, Anton Chehov atyndaǵy drama teatry jáne «Shańyraq» oblystyq ortalyǵy jańa avtobýstar men avtokólikterge qol jetkizip, kóshpeli is-sharalardy ótkizý múmkindikterin keńeıtti. Sonymen birge, demeýshilerdiń qoldaýymen Zaǵıp azamattarǵa arnalǵan, qalalyq jáne Múbárák Jamanbalınov atyndaǵy balalar kitaphanalary kúrdeli jóndeýden ótip jatyr.

Buǵan deıin Asaıyn Baıhanov Pavlodar sharýalary rekordtyq 1,1 mln tonna astyq jınaǵanyn aıtqan edi.