Muz aıdyny, parkıng, kógal: Prezıdent rezıdentsııasynyń ornyndaǵy jańa saıabaq qandaı bolady
ALMATY. KAZINFORM – Almatyda Prezıdent rezıdentsııasynyń ornyndaǵy jańa saıabaqta ınjenerlik jelilerdi júrgizýge 940 mıllıon teńge bólindi. Bul týraly Almaty qalasynyń ákimdigi Kazinform agenttigi joldaǵan saýalǵa bergen jaýabynda málimdedi.
Joba «Nazarbaev dańǵylynyń batysy men Gandı kóshesiniń soltústigindegi aýmaqty abattandyrý» dep atalady.
– Nazarbaev dańǵylynyń batysy men Gandı kóshesiniń soltústiginde ornalasqan 4,16 gektar aýmaqta zamanaýı jáne jaıly skver salý josparlanyp otyr. Jobany júzege asyrý eki kezeńge bólingen: skverdiń negizgi bóligin salý jáne ınfraqurylymdy damytý, - dep habarlady qala ákimdiginen.
Megapolıs basshylyǵynyń málimetinshe, joba ınklıýzıvtilik pen qoljetimdilik talaptaryna saı ázirlengen – saıabaq barlyq jastaǵy jáne qozǵalysy shekteýli turǵyndardyń qajettilikterin eskere otyryp salynady.
– Saıabaq tolyqtaı abattandyrylady: toǵan men sý tazartý júıesi, syrtqy jaryqtandyrý, ınjenerlik jeliler jáne aýmaqty keń kólemdi kógaldandyrý qarastyrylǵan. Qys mezgilinde muz aıdyny jumys isteıdi, - delingen ákimdiktiń jaýabynda.
Tehnıkalyq qadaǵalaý qyzmetine qatysty memlekettik satyp alý portalynda jarııalanǵan habarlamaǵa sáıkes, jańa saıabaqtyń astynda jerasty avtoturaq salý da josparlanǵan.
Sonymen qatar ákimdik jaýabyna sáıkes, qazirgi ýaqytta daıyndyq jumystary aıaqtalyp, burǵylaý jáne qurylymdardy bekitý jumystary júrip jatyr.
– Barlyq jumys bekitilgen merzimge sáıkes jáne jospar boıynsha júrip jatyr. Qurylys-montajdaý jumystary 2025 jyldyń aqpan aıynda bastaldy, aıaqtalýy osy jylǵa josparlanǵan. Injenerlik jelilerdi júrgizýge jergilikti bıýdjetten 940 mıllıon teńge qarastyrylǵan, al qurylys-montajdaý jumystaryn demeýshiler qarajylandyrdy, - delingen ákimdik jaýabynda.
Odan bólek joba aıasynda 1 500-den astam jasyl jelek otyrǵyzý kózdelgen. Olardyń qatarynda qylqan japyraqty jáne iri kólemdi 150 aǵash bar.
Jyl basynda Almatyda Prezıdent rezıdentsııasynyń ornyndaǵy saıabaq qashan ashylatynyn jazǵanbyz.
Eske salaıyq, 2022 jyly 5 qańtar kúni Prezıdent rezıdentsııasyn bir top adam basyp alyp, órtep jiberdi. Sondyqtan Memleket basshysynyń sheshimimen bul ǵımarat súrilip, onyń ornyna saıabaq salynatyny habarlandy.
Keıin Mamandar Almatydaǵy Prezıdent rezıdentsııasy nelikten súriletinin túsindirdi.
2022 jyly naýryz aıynda Almatydaǵy Prezıdent rezıdentsııasy tarıhı eskertkishter tiziminen alynyp tastaldy.
2022 jyly qazan aıynda Almaty ákimi Erbolat Dosaev Prezıdent rezıdentsııasyn súrý jumystary is júzinde aıaqtalǵanyn aıtty.