Muz astyna qulap ketseńiz ne isteý kerek – qutqarýshylar keńesi
ÓSKEMEN. KAZINFORM – Shyǵys Qazaqstan oblysynyń qutqarýshylary muz astyna qulap ketken jaǵdaıda ne isteý kerektigin túsindirdi.
Muzdaǵy qaýipsizdikti qamtamasyz etý maqsatynda ShQO TJD qutqarýshylary eriktiler jáne polıtsııa qyzmetkerlerimen birlesip 260-tan astam reıd júrgizdi. Turaqty túrde brıfıngter ótkizip, 2 jarym myńnan astam úgit-nasıhat paraqshasyn taratty.
Búginde óńirdegi sý qoımalarynda 64 eskertý jáne tyıym salý belgisi ornatylǵan. Qys bastalǵaly ÁQBtK-niń 412-babyn buzǵan 2 balyqshy ákimshilik jaýapkershilikke tartyldy.
«Balyqshy sý qoımalaryndaǵy qaýipsizdik erejelerine sáıkes qalyńdyǵy 25 santımetrden aspaıtyn muzǵa shyqqanda ózimen birge ysqyryq, qutqarý keýdeshesi men arqan alyp júrýi kerek. Uıaly telefonyn sý ótkizbeıtin qapqa salýy qajet», - dep habarlady departamenttiń baspasóz qyzmetinen.
Al eger muz astyna qulap ketseńiz:
- Úreılenbeńiz. Oqys qımyl jasamańyz, demińizdi turaqtandyryńyz.
- Qoldaryńyzdy eki jaqqa keńirek sozyp, deneńizge aǵys baǵytynda kóldeneń pozıtsııa berip, muzdyń shetine ilinýge tyrysyńyz.
- Keýdeńizdi muzdyń shetine aqyryn qoıyp kórińiz jáne bir aıaǵyńyzdy, sodan keıin ekinshi aıaǵyńyzdy muzǵa laqtyryńyz.
- Eger muz synbasa, baıaý jorǵalańyz nemese jaǵaǵa qaraı domalańyz.
- Qaı jaqtan keldińiz sol jaqqa qaraı jyljyńyz, óıtkeni ondaǵy muzdyń beriktigi tekserilgen.
