Muz astyna qulap ketken úsh balany qutqarǵan Kókshetaý turǵyny memlekettik marapatqa usynylady

KÓKShETAÝ. KAZINFORM – Qutqarýshylar Sergeı Tsýpkınniń endi memlekettik marapatqa usynylatynyn rastady, dep habarlaıdy Kazinform tilshisi.

Aqmola oblystyq Tótenshe jaǵdaılar departamenti baspasóz qyzmetiniń habarlaýynsha, Kókshetaý qalasynyń turǵyny, 42 jastaǵy Sergeı Tsýpkın Kylshaqty ózeniniń jaǵasynda júrgende kezdeısoq kámeletke tolmaǵan úsh balanyń muz ústimen júrip, sýǵa qulaǵanyn baıqaǵan. Sergeı esh oılanbastan olarǵa kómekke asyqty.

- Onyń áreketteriniń arqasynda úsheýi de jaǵaǵa shyǵarylyp, eń jaqyn jyly jerge jetkizildi. Qazirgi ýaqytta qalanyń úsh kishkentaı turǵynynyń ómirine qaýip tónip turǵan joq, qutqarýshynyń arqasynda olarǵa ýaqtyly medıtsınalyq kómek kórsetildi, - dep habarlady vedomstvo.

Bastapqyda qutqarylǵan balalar da, aımaqtyń qutqarýshylary da balalardy ajaldan kim arashalap qalǵanyn bilgen joq. Batyr er adam áleýmettik jelilerdiń arqasynda tabyldy.

- Bizdiń batyrymyz aty-jónin sońyna deıin jasyrýǵa tyrysty, biraq biz ony Aqmola oblystyq Tótenshe jaǵdaılar departamentine shaqyra aldyq, onda oǵan saltanatty túrde alǵys hat pen baǵaly syılyqtar tabys etildi, - dep qosyp ótti oblystyq TJD resmı ókili Ersaıyn Qoıshybaev.

Endi Sergeı Tsýpkın memlekettik syılyqqa usynylatyn bolady.

Buǵan deıin Aqmola oblysynda Qylshaqty ózeninde úsh bala muz astyna túsip ketkenin habarlaǵan bolatynbyz.