Muxtar Ábilıazov - kosmopolıt, ol adamdardy paıdalanýdy biledi - Jarymbetov
ASTANA. QazAqparat - «BTA Banki» AQ basqarmasy basshysynyń burynǵy orynbasary Jaqsylyq Jarymbetov elge oraldy. Onyń oıynsha, búginde shetelde júrgen Muxtar Ábilıazov saıasatty jamylyp, bılikke talasýdy kózdeıdi, dep xabarlaıdy QazAqparat tilshisi.
«Men ózim saıasatpen aınalysqan emespin. Endi, qatardaǵy azamat retinde saıası jańalyqtardy oqyp júresiń ǵoı. Degenmen, birde-bir partııanyń músheliginde bolǵan joqpyn. Men ózim - qazaqı ortadan shyqqan adammyn. Qazaq mektebin bitirdim. Sondyqtan týǵan jerim ylǵı tartyp turady. Al Ábilıazov myrzada ondaı qasıet joq de oılaımyn. Menińshe, ol - kosmopolıt, bir nárseni istese, jeke múddesin kózdeıdi. Sonyń ishinde bank te, sondaǵy menedjerler men qyzmetkerler onyń qolynda belgili bir maqsatqa jetýdiń quraly ǵana boldy. Adam bılikti ańsasa, ne aıtýǵa bolady? Onyń ustanymy sondaı, kózqarasy sondaı. Oǵan qarsy men ne isteı alamyn? Óz basym meniń isime saıasattyń eshbir qatysy joq de oılaımyn», - deıdi Jarymbetov.
Aıta keteıik, búgin Jarymbetov arnaıy baspasóz máslıxatyn ótkizip, ózine qatysty taralyp jatqan alyp-qashpa áńgimelerdi joqqa shyǵardy.
Onyń sózine qaraǵanda, qańtardyń 17-si kúni Túrkııanyń shekara qyzmeti ony jalǵan tólqujatpen júrgeni úshin ustaǵan bolatyn. «Polıtsııa ýchaskesinde otyrǵanda men ózimniń shyn aty-jónimdi aıttym. Sosyn Ystanbuldaǵy Qazaqstannyń resmı ókildiligine xabarlasýdy ótindim. Sóıtip, qańtardyń 20-sy kúni meni Qazaqstanǵa ekstradıtsııalady. Ertesinde meni tergeý abaqtysyna qamady. Osy ýaqytqa deıin sonda boldym. Maǵan eshqandaı zorlyq-zombylyq pen qysymnyń jasalmaǵanyn málimdegim kelip otyr », - deıdi ol.
Onyń sózine qaraǵanda, osydan 8 jyl buryn bastalǵan qylmystyq is kezinde úreı-qorqynysh boldy. Sol sebepti Jarymbetov birden boı tasalap ketti. Al Ábilıazov úshin onyń elge oralǵany tıimsiz boldy.
