Muxamedıuly jastardy býkmekerlik keńselerden shyǵarýdyń jolyn tapty

ASTANA. QazAqparat - Qazaqstannyń «Lotereıa týraly» zańnyń arqasynda otandyq sportty damytyp qana qoımaı, bás tigý bıznesin de ashyq júıege keltirýge de bolady, dep habarlaıdy QazAqparat tilshisi.

QR Mádenıet jáne sport mınıstri Arystanbek Muxamedıulynyń aıtýynsha, lotereıadan túsetin tabystyń 15 paıyzy sportty damytýǵa jumsalady. «Shyny kerek, buǵan deıin ondaı zań bolmaǵan. «Lotereıa týraly» zań óte qıyn qujat boldy. Degenmen, biz ony qabyldadyq. Lotereıadan túsetin aqshanyń az emes ekenin bárimiz jaqsy bilemiz. Biraq qandaı salyq tólenedi? Kimge paıda túsip jatyr? Oǵan qarap otyrǵan eshkim joq. Biz osy salany ashyq qyldyq, bir júıege keltirdik. Eń bastysy, túsetin aqshanyń 15 paıyzy sportty damytýǵa baǵyttalatyn bolady. Sosyn osy saladaǵy álemniń úzdik kompanııalaryn tartyp jatyrmyz. «Nege?» deseńiz, eger lotereıa salasy jaqsy damysa, onda býkmekerlik keńseler men totalızatorlarda otyrǵan jastardyń barlyǵyn lotereıaǵa shyǵarýǵa bolady. Bul - álemdik tájirıbe. Ol úshin lotereıany ashyq salaǵa aınaldyrǵan mańyzdy», - dep atap kórsetti Arystanbek Muxamedıuly.

Aıta keteıik, búgin mınıstr qoǵamdyq keńes músheleri aldynda esep berdi. Arystanbek Muxamedıulynyń aıtýynsha, sportqa arnalǵan jańa zańnama boıynsha árbir oblys ózine tán sport túrin damytatyn bolady.