Muxamedıuly «Pxenchxan Olımpıadasy tabysty bolady» degen ýádesin túsindirdi
«Bas kezinde men Olımpıadanyń tabysty bolatynyn aıtqanmyn. Endi, buqaralyq aqparat quraldary ol tabys qaıda dep, menen surap júr. Men alqa májilisinde jaýap berýge ýáde ettim», - dedi A.Muxamedıuly búgin keńeıtilgen alqa otyrysynda.
Mınıstrdiń aıtýynsha, ol jańaǵy sózdi aıtqanda aldymen xalyqtyń qyzyǵýshylyǵyn oıatýǵa tyrysty. Sodan qazaqstandyqtar «tabysty» kútip, barlyǵy birdeı óz sportshylaryna jankúıer boldy.
«Al tabystyń negizgi máni nede? Biz qysqy Olımpıadaǵa 57 joldamany utyp aldyq. Qazaqstannyń namysyn 46 sportshy qorǵady. Jalpy, joldamalardyń sany jaǵynan biz Reseıden keıin ekinshi oryndamyz. Osynyń ózi úlken tabys emes pe? Máselen, Olımpıadanyń ashylýy kezinde qazaqstandyq sportshylar shyqqanda bári tańqaldy. Sosyn álem boıynsha mıllıardtaǵan adam jarystardy kórdi. Ol da Qazaqstan úshin úlken jarnama», - dep atap kórsetti A.Muxamedıuly.
Budan bólek, A.Muxamedıuly qysqy jáne jazǵy Olımpıadalardyń jetistikterin de salystyrdy. Rıo Olımpıadasynda Qazaqstan 22-shi orynnan kórindi. Al Pxenchxanda 28-shi orynǵa ıe boldy.
«Memleket basshysy 2050 jylǵa deıin 30 ozyq eldiń qataryna kirý mindetin belgilegen bolatyn. Biz bolsaq, qazirdiń ózinde sport jetistikteri jaǵynan otyzdyqqa kirip otyrmyz. Máselen, Pxenchxanda medal sany jaǵynan Norvegııa birinshi oryndy jeńip aldy. Al jazǵy Olımpıadaǵa olar múldem qatyspaıdy. Qazaqstan bolsa, eki birdeı Olımpıadaǵa qatysyp, 30 úzdik eldiń qataryna kirip otyr», - deıdi mınıstr Muxamedıuly.
Onyń aıtýynsha, Pxenchxan Olımpıdasyna qatysqan qazaqstandyqtardyń arasynda 16-20 jastaǵy sportshylar az emes. Ózimizdiń qarakóz qandastarymyz da kóbeıip keledi.
«Biz bir rettik tabys bolsa eken dep, jumys istep jatqan joqpyz. 16 jastaǵy sportshylarymyz bolashaqta úlken jetistikterge jete alady», - dep atap kórsetti A.Muxamedıuly.
