Muxamedıuly «Aıka» týraly: Meniń qyrǵyzdar týraly aıtqanyma bul fılmniń eshbir qatysy joq
QR Mádenıet jáne sport mınıstri Arystanbek Muxamedıulynyń aıtýynsha, atalǵan kartınaǵa memleket tarapynan qarjy bólingen joq. Bul - rejısser Sergeı Dvortsevoıdyń jeke týyndysy. "Meniń qyrǵyzdar týraly aıtqanyma bul fılmniń eshbir qatysy joq. Negizi, sol kezde men Shyńǵys Aıtmatovtyń shyǵarmashylyǵy men fılosofııasy týraly aıtqan edim. Sosyn qyrǵyz mıgranttaryn mysalǵa keltirdim. Fılmde dál sol jaǵdaılar kórsetiledi. Degenmen, bizdiń bul fılmge eshbir qatysymyz joq. Áıtpese, meniń aıtqan sózderimnen keıin "Qazaqfılmge" tapsyrys berip, osy fılmdi túsirdi degen oı paıda bolady. Olaı emes. Bul taza Sergeı Dvortsevoıdyń jeke jobasy. Ol fılmdi jeke aqshaǵa túsirdi. Biraq biz onymen "Qazaqfılm" arqyly áriptestik ornatýdy qalaımyz", - dedi A. Muxamedıuly Astanada ótken kezdesýde.
Mınıstr Muxamedıuly jas ártis Samal Eslıamovanyń jetistigin de erekshe atap ótti. Onyń sózine qaraǵanda, burynǵy KSRO-da, tipti postkeńestik ýaqytta da birde-bir ártis Kann festıvaliniń "Úzdik áıel róli" ataǵyna ıe bolmaǵan. "1958 jyly "Letıat jýravlı" fılmi "Palmovaıa vetv" baıqaýynyń altyn júldesin jeńip alǵan bolatyn. Sol kezde ártis Tatıana Samoılova tek ádilqazylar alqasynyń syılyǵyna ǵana ıe boldy. Sonyń ózinde KSRO xalqy qatty qýandy. Al Samal Eslıamova Kann festıvaliniń bas júldesin ıelendi. Saxnaǵa ulttyq kıimmen shyqty. Sózin de qazaq tilinde bastady", - dep atap kórsetti A.Muxamedıuly.
Al rejısser Sergeı Dvortsevoıdyń aıtýynsha, "Aıka" fılmine 2,5 mıllıon eýro jumsaldy. Túsirý jumystaryna alty jyl ketti. "Men ózim Qazaqstanda dúnıege kelgenmin. Anam áli kúnge deıin Shymkentte turady. Ol jaqta týystar da kóp. Men jıi baryp turamyn. Negizi, mentalıtet jaǵynan maǵan qazaqstandyqtar jaqyn. Óz tobyma solardy kóbirek jınaımyn. Sebebi olar jaqsy jumys isteıdi. Sosyn bir-birimizdi jaqsy túsinemiz", - deıdi S.Dvortsevoı.
Aıta keteıik, "Aıka" fılmi kúzde prokatqa shyǵady. "Aıka" úshin uıalmaısyzdar", - deıdi Samal Eslıamova.
