Musylmandarǵa «shylym shabýyly» jasalyp jatyr
ASTANA. 23 tamyz. QazAqparat - Dúnıejúzilik densaýlyq saqtaý uıymy (DSU) sońǵy ýaqytta shylym shegetinder qatarynyń kóbeıgenine alańdap otyr. Ókinishke qaraı, buǵan telejarnamalardyń da qosyp otyrǵan úlesi az emes ekeni aıtylǵan DSU baspasóz baıanynda. Bul jaıynda Abna.co aqparat kózine silteme jasap muslim.kz habarlady.
Málimdemede aıtylǵandaı, ásirese, tanymal teleserıaldarda temeki ónimderi tikeleı jáne janama túrde jarnamalanyp jatyr. Eń soraqysy, ótken Ramazan aıynda musylmandar kóp shoǵyrlanǵan Taıaý Shyǵys elderinde temeki jarnamasy efırden kóptep berilgen. Aýyzashardan keıin serıal kórý úshin teledıdarǵa telmiretin jurtqa temeki ónimderiniń jarnamasyn tyqpalaıtyn shylym óndiretin kompanııalarǵa ázirge áı deıtin áje, qoı deıtin qoja tabylmaı tur.
Osyǵan baılanysty DSU myna eki jaǵdaıǵa nazar aýdarýǵa shaqyryp otyr. Birinshisi - temeki óndirýshiler men oıyn-saýyq baǵdarlamalaryn usynatyndardyń arasyndaǵy baılanysqa tosqaýyl qoıý. Ekinshisinde temeki ónimderiniń jarnamasyna, demeýshiligine nemese ózge de joldarmen shylym shegýge yntalandyratyn sharalarǵa tyıym salý qarastyrylǵan Konventsııaǵa qol qoıǵan elderdi osy qujattyń 13-shi babynyń buzylmaýyn jiti qadaǵalaýǵa úndep otyr.
«Mundaı jarnamalarǵa, ásirese, jastar aldanyp qalady», - dedi DDSU-nyń Shyǵys Jerorta teńizi boıynsha aımaqtyq bıýronyń dırektory Áli Alban.
Musylman elderinde temeki ónimderin tutyný kórsetkishi tym joǵary. Er adamdarǵa shaqqanda bul kórsetkish, máselen, Týnıste - 52%, Pákistanda - 38%, al áıelder boıynsha Iemende - 11%, al Iordanııada - 6%. 13-15 jas aralyǵyndaǵylar boıynsha alsaq, bul kórsetkish Lıvanda - 40%, Katarda - 20%. Al boıjetkender arasynda Lıvanda - 40%. Ózge musylman elderinde - 10 paıyzdan 20 paıyzdyń arasynda.
