«Musylmandardyń páktigi» fılminiń avtoryn ustaǵanǵa qomaqty qarjy taǵaıyndaldy
ASTANA. 24 qyrkúıek. QazAqparat - Pákistannyń Temir jol mınıstri Gýlam Ahmad Bılýr
(Ghulam Ahmad Bilour) kópshilik aldynda «Musylmandardyń páktigi» antı-ıslamdyq fılminiń avtoryn óltirgenge 100 myń AQSh dollaryn beretindigin málimdedi. Bul týraly BBC Jańalyqtary habarlady.
Joǵary laýazymdy sheneýniktiń sózine qaraǵanda, ol bul qarjyny óz qaltasynan tóleıtin bolady. Ol sondaı-aq eger aldaǵy ýaqytta da osyǵan uqsas kartınalar túsiriletin bolsa, olardyń avtorlaryn ustaý úshin óz esebinen aqshalar bólýdi jalǵastyra beretindigin málim etti.
Ahmad Bılýr batys elderdi sóz bostandyǵyn jeleý etýdi toqtatyp, Muhammed Paıǵambarǵa til tıgizýge zańdy negizde tyıym salýǵa shaqyrdy.
Sheneýnik bul sózderdi Pákistanda atyshýly fılmge narazylyq bidirýshiler men polıtsııanyń qaqtyǵysy bolǵan kúnnen keıin - senbide aıtty. Qaqtyǵys barysynda 20-ǵa jýyq adam mert boldy.
Aıta keteıik, Pákistan úkimeti mınıstrdiń bul sózderin aıyptady. El premer-mınıstriniń baspasóz hatshysy Shavkat Djalıl (Shafqat Jalil) atap ótkendeı, Bılýr bıleýshi partııanyń múshesi bolsa-daǵy, ol kartınaǵa qatysty pikirlerin tek óz atynan ǵana bildirdi. Ol sondaı-aq Pákistannyń resmı bıligi mınıstrdiń bul ustanymyn bólispeıtindigin málim etti.
