«Musylmandardyń páktigi» fılminiń avtorlarynyń biri izin sýytty
ASTANA. 17 qyrkúıek. QazAqparat - Atyshýly «Musylmandardyń páktigi» fılminiń avtorlarynyń biri polıtsııada túsinik bergennen keıin belgisiz baǵytta izin sýytty, dep habarlady Ýtro.rý.
«Ol joǵalyp ketti. Biz onyń qaıda ekenin bilmeımiz. Ol úıine qaıtyp oralmaıtynyn aıtty», - dep jazdy The Associated Press agenttigi polıtsııa ókili Stıv Ýıtmırdiń sózine silteme jasap.
Negizinde 55 jastaǵy Nakýladan túsinik alý atyshýly kartınaǵa qatysy joq edi. Polıtseılerdi onyń merziminen buryn bosaý sharttaryn buzǵan-buzbaǵandyǵy qyzyqtyrǵan. Ol polıtsııaǵa betin barynsha tumshalap kelgen - ústinde palto, qulaǵynyń ushyna deıin tartylǵan sharf, kepka men kózildirik boldy. Nakýlany osy kúıinde jýrnalıster sýretke túsirip aldy.
Anyqtalǵandaı, 2010 jyly Nakýla alaıaqtyq úshin isti bolyp, ǵalamtordy, kompıýterdi nemese «jalǵan esimderdi» paıdalanbaý shartymen jazalaýdan bosatylǵan.
Nakýla atyshýly týyndynyń túsirilýine basshylyq etken degen boljam bar. Oǵan taǵy kimderdiń qatystylyǵy bar ekendigi naqty belgili emes. Fılmniń rejısseri Sem Beısıl esimdi áldebireý sanalady (onyń Nakýla bolýy da ǵajap emes). Jýrnalıster sondaı-aq stsenarııdi jazǵan adamdy tapty, ol Vetnam soǵysynyń ardageri Stıven Klıaın bolyp shyqty. Ol jýrnalısterdi óz úıinde qabyldady, onyń ústine ol ish-kıimde bolǵan ári tapanshasyn sermeı bergen. Onyń sózine qaraǵanda, ol sóz bostandyǵy úshin kúresýde jáne óziniń senimderi úshin ólýge daıyn.
