Musylmandar soraqy karıkatýranyń avtorlaryn sotqa berdi

ASTANA. 11 jeltoqsan. QazAqparat - Frantsýzdardyń eki musylman uıymy Paıǵambarymyzdy (s.a.s.) kelemejdegen karıkatýrany jarııalaǵany úshin «Charlie Hebdo» satıralyq jýrnalyn sotqa berdi, dep habarlaıdy muslim.kz.

Beıbitshilik pen progress úshin dep atalatyn Aljırdiń demokratııalyq odaǵy men Arab odaǵy uıymynyń sotqa túsirgen shaǵymynda aıtylǵandaı, bul karıkatýra Paıǵambarymyz Muhammed Mustafanyń (s.a.s.) múbárak esimine kir keltirip, musylman qoǵamynyń ar-namysyn taptaǵan. Bul jaıynda France 24 habarlady.

Atalmysh uıymdar sottan musylmandardy qoldap-qorǵaýdy jáne musylmandardyń ar-namysyna tıgeni úshin jýrnaldan 780 000 eýro mólsherinde ótemaqy óndirip berýdi talap etken.

Al basylymnyń qorǵaýshysy Rıshar Malka redaktsııa atynan bul aıyptaýdy joqqa shyǵaryp otyr.

Malkanyń aıtýynsha, aıyp taqqan jaq karıkatýranyń ádettegi basylymda emes, satıralyq jýrnalda basylǵanyn qaperge alǵysy kelmeıtin kórinedi.

«Olar úreı týdyryp, frantsýzdyq satıra dástúrin dinniń yǵyna jyǵyp bermek», - dep málimdedi qorǵaýshy óz sózinde.

Musylman uıymdarynyń qorǵaýshysy Entonı Bem satıralyq jýrnal ıman keltirgenderdiń quqyǵyn buzdy dep otyr.

«Olar musylmandarǵa kúıe jaǵyp, arandatý áreketine baryp otyr. Karıkatýra eken dep,  oılaryna kelgenin isteýge bolmaıdy», - dep málimdedi Bem AFP-ke bergen suhbatynda.