Musylmandar beıiti bir úlgide turǵyzyla bastady
Óskemenniń irgesindegi Samsonovka aýylynyń mańynda ornalasqan musylmandar zıraty sońǵy jyldardan beri birkelki etilip, biryńǵaı tártippen turǵyzylyp keledi. Biri beıitti kúmbez etip kóterip, ekinshisi odan asyp túsip, asqaqtaǵan zırat salatyn qazirgi zamanda, oblys ortalyǵyndaǵy musylmandar zıratynda qolǵa alynǵan jańa júıe halyqtyń kókeıinde júrgen kóp saýalǵa tabylǵan bir jaýap boldy.
«Bizdiń oblysta ár aýdandardyń ózinde jerleý joralǵylary birdeı emes. Bireýler jerdiń yńǵaıyna qaraı, endi bireýler qurylys materıaldarynyń túrine qaraı qabirdi, beıitti ártúrli etip qazyp, kóterip jatady. Sondyqtan beıitterdi jınaýda sharıǵat talaptaryna saı musylmandyq joralǵylar saqtalyp, qamtylsyn degen shart eń basty maqsatymyz boldy», - deıdi Samsonovka aýylynyń janyndaǵy beıitterdi retke keltirip, jurtqa osy musylmandar zıraty jabdyǵynyń qyzmetin kórsetip otyrǵan jeke kásipkerliktiń ıesi Baýyrjan Qusaıynov.
Beıitterdi biryńǵaı etip turǵyzýǵa alǵashqyda birdi-ekili adam qarsy bolǵanymen, birte-birte jańa erejege kelisim bergen.
Budan bólek, jerleýge ákelingen adamdar tirkelip, olardyń qandaı aýrýdan, neden kóz jumǵany kórsetilip otyrady. Tirkeý jýrnalynda qaı qatarda, qandaı nómirge qoıylǵany da qosa jazylyp turady.
Sondaı-aq Samsonovkadaǵy musylmandar beıitinde qoǵam qaıratkerleri men tanymal tulǵalar jerlenetin «Qurmetti azamattar alleıasyn» jasaý kózdelgen. Boshaı ata, Asylbek Sábekov, Qanıpa Bitibaeva syndy el qurmetine bólenip, eńbegi sińgen jandar damyldap jatqan beıitter qazir munda bir bólek, oqshaý tur. Qatary kóbeıip kele jatqan ondaǵy zırattardyń kópshiligi granıtten turǵyzylýda. Qalalyq ákimdikten, mekemelerden tyl eńbekkerlerin, Uly Otan soǵysy, Aýǵan soǵysy ardagerlerin de osy jerge jerleýge ótinishter kelip túsip jatady eken.
Samsonovkadaǵy zıratqa aıyna - 25-30, jylyna 300-ge jýyq adam jer qoınyna tapsyrylady.
Anyqtalǵandaı, birkelki etip jınalyp jatqan beıitterdi kóterýge 178 -225 myń teńge kóleminde qarjy ketedi. Belgi tasy, basynda aıy, tórt jaǵynda sharlary bar biryńǵaı úlgidegi beıitterdi salýǵa, materıaldaryna 225 myń teńge jumsalady. Esik jáne basqa da qosymsha sáýlettik nyshandar qoıǵysy kelgender ústinen taǵy aqsha tóleıdi.
Baýyrjan Qusaıynov atap kórsetkendeı, «Jer qatynastary týraly» Qazaqstan Zańynyń 139-babynda ómirden qaıtqan Qazaqstan azamatyna 6 sharshy metr tegin jer beriletindigi jazylǵan. ıAǵnı qaza bolǵan adamdarǵa jer tegin beriledi. Al jerdiń satylyp jatqandyǵy týraly áńgimeler qaýeset bolyp tabylady.
15 gektar jerdegi Samsonovka mańyndaǵy musylman zıratynyń aýmaǵy 20 jylǵa deıin paıdalanýǵa jetedi eken. Keıin onyń janyndaǵy bos turǵan 35 gektar jer de zırat maqsatynda paıdalanýǵa qosylyp berilýi múmkin.
