Musylman jigiti jyldyń eń jas kósemi degen ataqqa ıe boldy
ASTANA. 22 qarasha. QazAqparat - Avstralııada turatyn arǵy tegi kashmırlik musylman osy eldiń «eń jas kósemi» dep tanylyp, 2014 jyly Sıdneıdegi ýnıversıtet janynan ashylǵan bıznes-mekteptiń shákirtaqysyn alatyn boldy. Bul týraly muslim.kz saıty habarlap otyr.
«Bul - men úshin úlken maqtanysh. Men bul syılyǵymdy jansaraıymnyń tórinen oryn alǵan týǵan jerim Kashmırge tartý etemin»,- deıdi 34 jastaǵy danyshpan Omar Han Kashmir Reader aqparat kózine bergen suhbatynda.
«Men jıyrma jyldaı Avstralııada tursam da Kashmırdi bir sátke de umytqan emespin»,- dedi ol sózin sabaqtap.
Oǵan 60 000 dollar mólsherindegi shákirtaqyny AustralianFinancialReview (AFR) tıesili BOSS jýrnaly men Sıdneı ýnıversıtetiniń bıznes mektebi tapsyratyn boldy.
Buǵan qosa, Omar Han BOSS jas kósemderiniń baǵdarlamasyna múshe bolyp, basshylyq qyzmetke baýlıtyn «Kósemder lanchesi» dep atalatyn eń bedeldi ári belgili sharaǵa qatysýǵa múmkindik aldy.
Kashmırlik musylman Avstralııaǵa 12 jasynda kelip, ómirde jetistikke jetý úshin kóp kúsh-jigerin jumsady. Onyń eki ýnıversıtetti bitirgendigin aıǵaqtaıtyn eki birdeı dıplomy bar. Qazirgi ýaqytta ıslamı ınvestıtsııalyq CrescentWealth fırmasynda strategııa jáne damý jónindegi dırektor bolyp qyzmet atqarady.
Kósemdik qasıetimen top jaryp shyqqandarǵa júlde tapsyratyn ádilqazylar alqasynyń múshesi, professor Rıchard Holl aıtqandaı, mundaı shákirtaqy óz salasynyń bilgirleri men alǵa umtylatyn alǵyr da zerek tulǵalarǵa beriledi.
