Musylman memleketteriniń jartysy saýatsyz - Túrkııa prezıdenti
«Kezinde Islam álemi bilim, ǵylym men ınnovatsııalardyń ortalyǵy boldy. Artynan sonyń barlyǵy ekinshi orynǵa túsip ketti. Sol kezde toqyraý zamany bastaldy. Qazirgi kezde álemdegi musylman halqynyń 55 paıyzy saýatsyz. Ekonomıkalyq damý jáne yntymaqtastyq uıymyna múshe memleketterde bilim berý salasyna jalpy ishki ónimniń 5,2 paıyzyn jumsalady. Al musylman elderinde atalǵan kórsetkish 1 paıyzǵa da jetpeıdi. Bizdiń mańdaı aldy ǵalymdarymyz bolsa, Batysqa ketip, sol jaqta qyzmet etip júr», - dep atap kórsetti Erdoǵan búgin Islam yntymaqtastyǵy uıymnyń ǵylym jáne tehnologııalar jónindegi sammıtinde.
Onyń aıtýynsha, qazirgi kezde musylman elderi aqparattyq tehnologııalardy shyǵarmaıdy. Alaıda árbir memleket ulttyq qaýipsizdigine basa nazar aýdarýy qajet.
Astanadaǵy sammıtke Ózbekstan, Pákistan, Ázerbaıjan, Aýǵanstan, Iran, Túrkııa, Venesýela, Kamor araldary, Mavrıtanııa, jáne basqa da musylaman memleketteriniń prezıdentteri men úkimet basshylary keldi.
Aıta keteıik, Islam yntymaqtastyǵy uıymy - 1969 jyly 25 qyrkúıekte musylman memleketteri basshylarynyń Rabatta ótken konferentsııasynda negizi qalanǵan eń iri jáne yqpaldy úkimettik ári halyqaralyq musylman uıymy. Qazirgi ýaqytta ol jalpy sany shamamen 1,5 mıllıard adamdy qamtıtyn 57 eldiń basyn biriktirip otyr.
IYU-nyń negizgi qaǵıdattary mynalar: tolyq teńdik; ár halyqtyń óz taǵdyryn ózi sheshý quqyǵyna degen qurmet; ishki isterine aralaspaý; memleketterdiń egemendigin, táýelsizdigin jáne aýmaqtyq tutastyǵyn qurmetteý; IYU-ǵa múshe memleketter arasyndaǵy daýly máselelerdi kelissóz, araaǵaıyndyq nemese arbıtraj arqyly beıbit jolmen sheshý; uıymǵa múshe memleketter aýmaqtarynyń tutastyǵyna, sonymen birge saıası táýelsizdigine de qarsy kúsh qoldanbaý nemese qoqan-loqqy kórsetpeý.
Qazaqstan 1995 jyly Islam yntymaqtastyǵy uıymynyń tolyq quqyly múshesine aınaldy.
