Musylman qyzy álemdegi eń aqyldy 50 oqýshynyń qatarynda
ASTANA. 25 qazan. QazAqparat - Nıgerııadan shyqqan výnderkınd musylman qyzy óziniń boıyndaǵy qarym-qabileti men talantyn tanytyp, álemniń eń aqyldy degen 50 oqýshynyń tizimine endi. Bul týraly muslim.kz habarlady.
Nıý-Djersıde turatyn 16 jastaǵy Sahıla Ibrahım Garvard ýnıversıtetine tústi. Sonymen birge, ol AQSh-tyń Pensılvanııa, Kornell, Braýn, Prınston, Kolýmbııa jáne Chıkago sekildi bedeldi 12 ýnıversıtetine oqýǵa qabyldandy.
Sahılanyń ǵylym salasyndaǵy jetistikteri mektep qabyrǵasynda júrgen kezde-aq baıqalǵan. Alǵyrlyǵymen jáne zerektigimen, sondaı-aq, izdenimpazdyǵymen kózge túsken ol mekteptiń oqý baǵdarlamasynda joq kóptegen pánderdi óz betinshe oqyp, birtalaı tildi meńgergen. Atap aıtqanda, ol aǵylshyn tilinen ózge ıorýba, arab, ıspan, latyn tilderin biledi.
Sonymen qatar, ol mekteptiń ınvestıtsııalyq klýbyn basqarady jáne neırobıologııamen shuǵyldanady.
